ഐ.എസ്​.ആർ.ഒ റോക്കറ്റ്​ എൻജിൻ നിർമാണം ഇനി ഒരു കുടക്കീഴിൽ

ബംഗളൂരു: ഇന്ത്യൻ സ്​പേസ്​ റിസർച്ച്​ ഓർഗനൈസഷന്​ (ഐ.എസ്​.ആർ.ഒ) വേണ്ടിയുള്ള റോക്കറ്റ്​ എൻജിൻ നിർമാണം ഇനി ബംഗളൂരുവിൽ ഒരു കുടക്കീഴിൽ. ഹിന്ദുസ്ഥാൻ എയറോനോട്ടിക്സ്​ ലിമിറ്റഡിന്‍റെ (എച്ച്​.എ.എൽ) റോക്കറ്റ്​ എൻജിനുകളുടെ നിർമാണ കേന്ദ്രം രാഷ്ട്രപതി ദ്രൗപതി മുർമു ഉദ്​ഘാടനം ചെയ്തു. ഇന്‍റഗ്രേറ്റഡ്​ ക്രയോജനിക്​ എൻജിൻ മാനുഫാക്​ചറിങ്​ ഫെസിലിറ്റി (ഐ.സി.എം.എഫ്)​ ആണ്​ പ്രവർത്തനം തുടങ്ങിയത്​. ഇന്ത്യ നിർമിക്കുന്ന റോക്കറ്റുകളുടെ ക്രയോജനിക്​-സെമി ക്രയോജനിക്​ എൻജിനുകൾ ഇനി ഈ കേന്ദ്രത്തിലാണ്​ നിർമിക്കുക. 4,500 സ്ക്വയർ മീറ്ററിലാണ്​ ഐ.സി.എം.എഫ്​ സജ്ജമാക്കിയിരിക്കുന്നത്​. അത്യാധുനിക സൗകര്യങ്ങളുള്ള 70 അനുബന്ധ ഉപകരണങ്ങളുമുണ്ട്​.

2013ലാണ്​ എച്ച്​.എ.എല്ലിൽ റോക്കറ്റ് എൻജിൻ ഭാഗങ്ങൾ നിർമിക്കുന്ന കേന്ദ്രം തുടങ്ങാൻ​ ഐ.എസ്​.ആർ.ഒയുമായി കരാർ ഉണ്ടാക്കിയത്​. 2016ൽ​ കരാറിൽ ഭേദഗതി വരുത്തി റോക്കറ്റ്​ എൻജിൻ പൂർണമായി നിർമിക്കുന്ന ഐ.സി.എം.എഫ്​ സ്ഥാപിക്കാൻ തീരുമാനമായി. 208 കോടി രൂപയാണ്​ ചെലവ്​. റോക്കറ്റ്​ എൻജിൻ നിർമാണത്തിനുള്ള വൻകിട ഉപകരണങ്ങളുടെ കമീഷനിങ്​ നേരത്തേ പൂർത്തിയായിട്ടുണ്ട്​. മാർച്ച്​ 2023ഓടെ ഇവിടെ നിന്ന്​ റോക്കറ്റ്​ എൻജിനുകൾ പുറത്തിറക്കും. സമീപഭാവിയിൽ തന്നെ ബഹിരാകാശ യാത്രയും പരീക്ഷണവുമൊക്കെ പൂർണമായും ക്രയോജനിക്​ സാ​ങ്കേതികവിദ്യയെ ആശ്രയിച്ചായിരിക്കുമെന്നും എച്ച്​.എ.എൽ അറിയിച്ചു.

റോക്കറ്റുകളിൽ ക്രയോജനിക്​ എൻജിനുകളാണ്​ ലോകത്ത്​ കൂടുതലായി ഉപയോഗിക്കുന്നത്​. നിലവിൽ യു.എസ്​.എ, ഫ്രാൻസ്​, ജപ്പാൻ, ചൈന, റഷ്യ എന്നീ രാജ്യങ്ങൾക്കു​ മാത്രമാണ്​ ക്രയോജനിക്​ എൻജിൻ സാ​ങ്കേതികവിദ്യയിൽ അത്യാധുനിക സൗകര്യമുള്ളൂ. പോളാർ സാറ്റലൈറ്റ്​ ലോഞ്ച്​ വെഹിക്കിൾ (പി.എസ്​.എൽ.വി), ജി.എസ്​.എൽ.വി എം.കെ. ടു, ജി.എസ്​.എൽ.വി എം.കെ. ത്രി എന്നിവ വഹിക്കുന്ന വാഹനഭാഗങ്ങളുടെ നിർമാണം, പ്രൊപലന്‍റ്​ ടാങ്കുകളുടെ നിർമാണം എന്നിവ നേരത്തേ എച്ച്​.എ.എല്ലി​െന്‍റ എയ്റോ സ്​പേസ്​ ഡിവിഷനിൽ നടത്തിയിട്ടുണ്ട്​. 2014 ജനുവരിയിൽ ഇന്ത്യ, ക്രയോജനിക്​ എൻജിൻ അടങ്ങിയ ജി.എസ്​.എൽ.വി-ഡി. അഞ്ച്​ വിജയകരമായി വിക്ഷേപിച്ചിരുന്നു. ഇതോടെ ക്രയോജനിക്​ എൻജിൻ വികസിപ്പിക്കുന്ന ആറാമത്തെ രാജ്യമായി ഇന്ത്യ മാറി. സ്വകാര്യ സ്ഥാപനങ്ങൾ വഴിയായിരുന്നു​ ഇതിനുള്ള എൻജിനുകൾ ഐ.എസ്​.ആർ.ഒ ഉണ്ടാക്കിയത്​.