ബി.എഫ്. 7 സ്ഥിരീകരിക്കുന്നവർക്ക് കർണാടകയിൽ സൗജന്യചികിൽസ

ബംഗളൂരു: കോവിഡിന്‍റെ ഉപവകഭേദമായ ബി.എഫ്. 7 സ്ഥിരീകരിക്കുന്നവർക്ക് കർണാടകയിൽ സൗജന്യ ചികിത്സ ഏർപ്പെടുത്തി. രോഗം സ്ഥിരീകരിക്കുന്നവർക്ക് ബംഗളൂരുവിലെ ബൗറിങ് ആശുപത്രിയിലും മംഗളൂരുവിലെ വെൻലോക്ക് ആശുപത്രിയിലും ചികിത്സ സൗജന്യമാണ്. ഈ രണ്ട് ആശുപത്രികളിലുമാണ് ബി.എഫ്. 7 ബാധിതരെ ചികിത്സിക്കുന്നതിനുള്ള പ്രത്യേക സൗകര്യങ്ങൾ ഒരുക്കിയത്.

ചൈനയിൽ കോവിഡ് വ്യാപനത്തിന് കാരണമായ ബി.എഫ്. 7 ഉപവകഭേദം ഇന്ത്യയിലും വ്യാപിക്കുന്നത് തടയാനാവശ്യമായ മുൻകരുതലുകൾ സ്വീകരിച്ചുവരുകയാണെന്ന് ആരോഗ്യവകുപ്പ് അറിയിച്ചു. സംസ്ഥാനത്തെ ആശുപത്രികളിലെ ഓക്സിജൻ പ്ലാന്‍റുകളുടെയും വെന്‍റിലേറ്ററുകളുടെയും പ്രവർത്തനം വിലയിരുത്താനും ഒരുക്കങ്ങൾ പരിശോധിക്കാനും എല്ലാ ജില്ലയിലും ഉന്നതതല സമിതിയെ നിയോഗിച്ചിട്ടുണ്ട്.