ബുള്ളറ്റ് ട്രെയിൻ നിർമാണശാല 'ആദിത്യ'ക്ക് തുടക്കം

ബംഗളൂരു: ഇന്ത്യ സ്വന്തമായി രൂപകൽപ്പന ചെയ്ത ആദ്യ അതിവേഗ ബുള്ളറ്റ് ട്രെയിൻ അടുത്ത വർഷം ഏപ്രിലിൽ പുറത്തിറങ്ങും. മുംബൈ-അഹമ്മദാബാദ് പാതയിലാണ് ഈ ട്രെയിൻ സർവീസ് നടത്തുക. പദ്ധതിയുടെ ഭാഗമായി അതിവേഗ ട്രെയിനുകളുടെ നിർമ്മാണത്തിനായി ബംഗളൂരുവിലെ ബി.ഇ.എം.എൽ തിപ്പസാന്ദ്ര കാമ്പസിൽ സജ്ജമാക്കിയ ‘ആദിത്യ’ നിർമാണ സമുച്ചയം റെയിൽവേ മന്ത്രി അശ്വിനി വൈഷ്ണവ് ഉദ്ഘാടനം ചെയ്തു.

ഇന്ത്യയുടെ ‘സ്വദേശി’ അതിവേഗ റേക്കുകളുടെ നട്ടെല്ലായ ബി-28 ട്രെയിൻ സെറ്റുകൾ നിർമ്മിക്കാനാണ് ഈ അത്യാധുനിക സൗകര്യം ഒരുക്കിയിരിക്കുന്നത്. പ്രതിവർഷം ഏകദേശം 100 കോച്ചുകൾ നിർമിക്കാനുള്ള ശേഷി ആദിത്യ നിർമാണ കേന്ദ്രത്തിനുണ്ട്. ചെന്നൈയിലെ ഇന്റഗ്രൽ കോച്ച് ഫാക്ടറിയും (ഐസിഎഫ് ) ബി.ഇ.എം.എല്ലും സംയുക്തമായാണ് ബി-28 ട്രെയിൻ സെറ്റുകൾ രൂപകൽപ്പന ചെയ്തത്. നിലവിൽ രൂപകൽപ്പന പൂർത്തിയായതായും ഉടൻ നിർമാണ പ്രവർത്തനങ്ങൾ ആരംഭിക്കുമെന്നും മന്ത്രി അറിയിച്ചു. ജപ്പാനിൽ നിന്ന് ഒരു ട്രെയിൻ സെറ്റ് കൂടി ഇന്ത്യയിലെത്തും.