ഡോ. സുഷമ ശങ്കറിന് ഭാരതീയ നാരീരത്ന പുരസ്കാരം

ബംഗളൂരു: മലയാളി എഴുത്തുകാരിയും വിവർത്തകയുമായ ഡോ. സുഷമ ശങ്കറിന് ഗ്ലോബൽ സ്കോളേഴ്സ് ഫൗണ്ടേഷന്റെ 'ഭാരതീയ നാരീരത്ന' പുരസ്കാരം. ദ്രാവിഡഭാഷ സാഹിത്യത്തിന് നൽകിയ സംഭാവനകൾ മാനിച്ചാണ് പുരസ്കാരം. കഴിഞ്ഞദിവസം പുണെയിൽ നടന്ന ചടങ്ങിൽ ഗദ്ദാം പത്മജ റെഡ്ഡി പുരസ്കാരം കൈമാറി.

പുരസ്കാരം എഴുത്തിൽ കൂടുതൽ ഉത്തരവാദിത്തം നൽകുന്നതായും ദ്രാവിഡ ഭാഷാസാഹിത്യ മേഖലയിൽ കൂടുതൽ പ്രവർത്തിക്കാൻ പുരസ്കാരം പ്രചോദനം നൽകുന്നതായും ദ്രാവിഡഭാഷ വിവർത്തക അസോസിയേഷൻ പ്രസിഡന്റുകൂടിയായ ഡോ. സുഷമ ശങ്കർ പ്രതികരിച്ചു.

ബംഗളൂരു വൈറ്റ്ഫീൽഡിൽ ശ്രീ സരസ്വതി എജുക്കേഷൻ ട്രസ്റ്റ് എന്ന ഭാഷാവിദ്യാഭ്യാസ സ്ഥാപനം നടത്തുന്ന സുഷമ ശങ്കർ കൊല്ലം കണ്ണനല്ലൂർ സ്വദേശിയാണ്. 'തൊദൽ നുഡി' എന്ന കന്നഡ മാസിക പത്രാധിപയാണ്.