കൃഷി ഓഫിസർ, അസി. ഓഫിസർ നിയമന മാനദണ്ഡം മാറ്റണം; കാർഷിക സർവകലാശാല വിദ്യാർഥികൾ സമരത്തിൽ

ബംഗളൂരു: കൃഷി ഓഫിസർ, അസി. കൃഷി ഓഫിസർ തസ്തികകളിലേക്കുള്ള നിയമനത്തിന് കർണാടക പരീക്ഷ അതോറിറ്റിയുടെ പരീക്ഷ അടുത്ത മാസം എട്ട്, ഒമ്പത് തീയതികളിൽ നടക്കാനിരിക്കെ യോഗ്യത മാനദണ്ഡം ചോദ്യം ചെയ്ത് ധാർവാഡ് കാർഷിക ശാസ്ത്ര സർവകലാശാല ബിരുദ വിദ്യാർഥികൾ പ്രക്ഷോഭം ആരംഭിച്ചു. സംസ്ഥാന സർക്കാർ നിയമന വിജ്ഞാപനം പിൻവലിച്ച് പുതിയ വിജ്ഞാപനം പുറപ്പെടുവിക്കണമെന്ന് ആവശ്യപ്പെട്ടാണ് പ്രതിഷേധം.

കൃഷി വകുപ്പിലെ 945 ഗ്രൂപ്പ്-ബി കൃഷി ഓഫിസർ, അസി. കൃഷി ഓഫിസർ തസ്തികകളിലേക്കുള്ള നിയമനത്തിനാണ് പരീക്ഷ നടക്കുന്നത്. ബിഇ ബയോടെക്നോളജി ബിരുദധാരികളെയും സ്വകാര്യ കാർഷിക കോളേജുകളിലെ വിദ്യാർത്ഥികളെയും യോഗ്യരായ ഉദ്യോഗാർത്ഥികളിൽ ഉൾപ്പെടുത്തിയത് ഒഴിവാക്കി സാങ്കേതിക തസ്തികകൾ കൃഷിയും അനുബന്ധ കാർഷിക ബിരുദങ്ങളും ഉള്ള ബിരുദധാരികൾക്ക് മാത്രമായി സംവരണം ചെയ്യണമെന്ന് സമരത്തിലുള്ള വിദ്യാർഥികൾ ആവശ്യപ്പെട്ടു. കൃഷി വകുപ്പിലെ എല്ലാ സാങ്കേതിക തസ്തികകളിലേക്കും യോഗ്യത ഇന്ത്യൻ കാർഷിക ഗവേഷണ കൗൺസിൽ അംഗീകൃത കൃഷി, അനുബന്ധ കാർഷിക പരിപാടികളിൽ നിന്നുള്ള ബിരുദധാരികൾക്ക് മാത്രമായി പരിമിതപ്പെടുത്തണമെന്ന് കോളജ് അസോസിയേഷൻ നേതാക്കളായ ചിരദീപ്, ഹരിഷിത ലാൽ, രാഹുൽ നായക് എന്നിവർ പറഞ്ഞു.

സർക്കാർ ജോലികൾ ഇതിനകം പരിമിതമാണ്. ആയിരക്കണക്കിന് കാർഷിക ബിരുദധാരികൾ സുരക്ഷിതമായ തൊഴിൽ കണ്ടെത്താൻ പാടുപെടുന്നു. ദീർഘകാലമായി നിലനിൽക്കുന്ന ഒഴിവുകൾ നികത്താനുള്ള സർക്കാരിന്റെ തീരുമാനത്തെ ഞങ്ങൾ സ്വാഗതം ചെയ്യുന്നു, പക്ഷേ ഈ തസ്തികകൾ കാർഷിക ബിരുദധാരികൾക്ക് മാത്രമേ നൽകാവൂ. ഫീൽഡ് ലെവൽ കാർഷിക വിപുലീകരണ പ്രവർത്തനങ്ങൾക്ക് ഞങ്ങളെ സജ്ജമാക്കുന്നതിനാണ് ഞങ്ങളുടെ നാല് വർഷത്തെ പാഠ്യപദ്ധതി പ്രത്യേകം രൂപകൽപന ചെയ്തിരിക്കുന്നത്. ബിഇ ബയോടെക്നോളജി ബിരുദധാരികളെ മത്സരിക്കാൻ അനുവദിക്കുന്നത് അശാസ്ത്രീയവും അന്യായവുമാണ് -അവർ പറഞ്ഞു.

മണ്ണ് ശാസ്ത്രം, ജലസേചനം, വിള പോഷകാഹാരം, വള പരിപാലനം, സസ്യ പ്രജനനം, കീടശാസ്ത്രം, സസ്യ രോഗശാസ്ത്രം, വിപുലീകരണ വിദ്യാഭ്യാസം എന്നിവ ഉൾക്കൊള്ളുന്ന ബഹുമുഖ മേഖലയാണ് കൃഷിയെന്ന് കാർഷിക സർവകലാശാല മുൻ പ്രഫസർ രാജേന്ദ്ര പോദ്ദാർ പറഞ്ഞു.

ഫീൽഡ് സർവീസിന് ആവശ്യമായ പ്രത്യേക അറിവ് ബിരുദ പാഠ്യപദ്ധതിയിൽ ഉൾപ്പെടുത്തിയിട്ടുണ്ട്. ബയോടെക്നോളജി ബിരുദധാരികൾക്ക് തൊഴിൽ സൃഷ്ടിക്കാൻ സർക്കാർ ആഗ്രഹിക്കുന്നുവെങ്കിൽ ബയോടെക്നോളജി വകുപ്പിന് കീഴിൽ പ്രത്യേക തസ്തികകൾ സ്ഥാപിക്കണം. കൃഷി ഓഫിസർ തസ്തികകൾക്ക് പ്രത്യേക കാർഷിക വൈദഗ്ദ്ധ്യം ആവശ്യമാണ് -അദ്ദേഹം അഭിപ്രായപ്പെട്ടു. വിദ്യാർഥികൾ ഉന്നയിക്കുന്ന ആവശ്യങ്ങൾ പ്രിൻസിപ്പൽ സെക്രട്ടറിയുടെയും മുതിർന്ന കൃഷി വകുപ്പ് ഉദ്യോഗസ്ഥരുടെയും ശ്രദ്ധയിൽപ്പെടുത്തിയിട്ടുണ്ടെന്ന്കൃ ഷി ശാസ്ത്ര സർവ്വകലാശാല വൈസ് ചാൻസലർ ഡോ. എൻ.ബി പ്രകാശ്പറഞ്ഞു.