പുതിയ ദേശീയപാത: ബത്തേരിയിൽ പരക്കെ ആശങ്ക

സുൽത്താൻ ബത്തേരി: പുതിയ ദേശീയപാത നിർദേശം പ​​ുറത്തുവന്നതോടെ എൻ.എച്ച്​ 766 സംബന്ധിച്ച്​ ബത്തേരി മേഖലയിൽ പരക്കെ ആശങ്ക. രാത്രിയാത്ര നിരോധനവുമായി ബന്ധപ്പെട്ട് സുപ്രീം കോടതിയിലുള്ള ഹരജികളിലെ വിധിയാണ്​ ഇനി നിർണായകം. വന്യമൃഗ സംരക്ഷണത്തി​​െൻറ പേരിലാണ് രാത്രി യാത്ര നിരോധനമുണ്ടാകുന്നത്.

 ബദൽപാതയുണ്ടായി വാഹനങ്ങൾ അതുവഴി പോയാൽ വന്യ മൃഗങ്ങൾ ​ൈസ്വരമായി വിഹരിക്കുമെന്ന​ വാദം ശക്തമായി ഉയരും. സംസ്ഥാന സർക്കാർ കാര്യമായി ഇടപെട്ടാൽ മാത്രമേ എൻ.എച്ച് 766 സംരക്ഷിക്കപ്പെടുകയുള്ളൂ. സഞ്ചാര സ്വാതന്ത്ര്യം തടസ്സപ്പെടുന്നതോടൊപ്പം സാമ്പത്തിക തകർച്ചയും ഉണ്ടാകുമെന്ന്​ ചൂണ്ടിക്കാട്ടിയാണ് കേരളം നിരോധനത്തെ എതിർത്തത്. മുഴുവൻ സമയ സഞ്ചാര സ്വാതന്ത്ര്യമാണ് കേരളത്തി​​െൻറ ആവശ്യം. എൻ എച്ച് 766‍​െൻറ പ്രാധാന്യം ഉൾക്കൊണ്ട് പാത തുറക്കണമെന്നും ഈ പാതക്ക് ബദൽ ഇല്ലെന്നുമുള്ള പ്രമേയം നിയമസഭ പാസാക്കിയിട്ടുണ്ട്​. എന്നാൽ, ജില്ലയിൽ പാർട്ടികളിലും മുന്നണികളിലും ഇപ്പോൾ ‘രണ്ടു ലൈൻ’ നിലപാട്​ രൂപപ്പെട്ടുവരുകയാണ്​.
ബത്തേരിയിൽ മുമ്പുണ്ടായതുപോലുള്ള ഒരു സമരത്തി​​െൻറ സാധ്യതയും ചില കേന്ദ്രങ്ങൾ ചർച്ച ചെയ്യുന്നുണ്ട്​. അതേസമയം, ഭരണകക്ഷികളും പുതിയ പാത തള്ളി നിലപാട്​ സ്വീകരിക്കുന്നില്ല.
ബന്ദിപ്പൂർ, നാഗർഹോള കടുവ സങ്കേതങ്ങളിലൂടെ കടന്നുപോകുന്ന നിർദിഷ്​ട പാതയും എൻ.എച്ച് 766 പോലെ വനമേഖലയിലൂടെയാണ്. 

മൈസൂരുവിൽനിന്ന്​ മലപ്പുറത്തേക്കുള്ള ദൂരക്കുറവും നിർദിഷ്​ട പാതയെ അപേക്ഷിച്ച് എൻ. എച്ച് 766 വഴി തന്നെയാണ്. സുൽത്താൻ ബത്തേരിയിൽനിന്ന്​ ഗുണ്ടൽപേട്ടയിലെത്താൻ 55 കിലോമീറ്ററുകൾ മാത്രമാണ് ഇപ്പോഴുള്ളത്. 
എന്നാൽ, പുതിയപാത വരുകയും 766 അടച്ചു പൂട്ടുകയും ചെയ്താൽ ഗുണ്ടൽപേട്ടയിലെത്താൻ മാത്രം 256 കി. മീറ്റർ ചുറ്റി സഞ്ചരിക്കേണ്ടി വരും. ഇത്​ തൊഴിലാളികൾ, പച്ചക്കറി വ്യാപാരികൾ തുടങ്ങിയവർക്ക്​ തിരിച്ചടിയാവും.
രാത്രി ഒമ്പതു മുതൽ രാവിലെ ആറു വരെയാണ് നിലവിൽ രാത്രിയാത്ര നിരോധനമുള്ളത്. ഇത്​ പകലും അടച്ചുപൂട്ടുമെന്ന ആ​ശങ്കയിൽനിന്നാണ്​ മുമ്പ്​ ബത്തേരിയിൽ ജനരോഷം ഇളകിമറിഞ്ഞത്​. കർണാടകയിൽനിന്നും തമിഴ്​നാട്ടിൽനിന്നും പിന്തുണയുമായി നിരവധി ​േപർ ഇവിടെയെത്തി. എന്നാൽ, വയനാട്ടിലൂടെ പുതിയ ദേശീയപാത നിർദേശത്തിനു പിന്നിൽ അണിയറയിൽ നിരവധി ചരടുവലികൾ നടന്നിട്ടുണ്ട്​.