ഒടുവിൽ മുട്ടിൽ സ്​റ്റാൻഡിൽ ബസുകൾ കയറിത്തുടങ്ങി

കൽപറ്റ: വർഷങ്ങളുടെ കാത്തിരിപ്പിനുശേഷം മുട്ടിൽ സ്​റ്റാൻഡിൽ ബസുകൾ കയറിത്തുടങ്ങി. 2015ൽ ഉദ്ഘാടനശേഷം ഷോപ്പിങ് കോംപ്ലക്സിൽ പഞ്ചായത്ത് ഒാഫിസും മറ്റും പ്രവർത്തിച്ചിരുന്നെങ്കിലും ബസ് ബേ നിർമാണം പൂർത്തിയായിരുന്നില്ല. നവീകരണത്തിനുശേഷം കഴിഞ്ഞയാഴ്ചയാണ് ബസുകൾ ബസ്​ബേയിൽ കയറി യാത്രക്കാരെ കയറ്റിത്തുടങ്ങിയത്. റോഡിൽ നിന്നും സ്​റ്റാൻഡിലേക്ക് കയറുമ്പോൾ ബസി​െൻറ അടി റോഡിൽ തട്ടുന്നത് ബസിനും റോഡിനും ഒരുപോലെ കേടുപാടു വരുത്തുന്നുണ്ട്. കൽപറ്റ ഭാഗത്തേക്കുള്ള കാത്തിരിപ്പു കേന്ദ്രം തൊട്ടടുത്ത്​ അതുപോലെ നിലനിൽക്കുന്നതിനാൽ അടുത്തടുത്തായി രണ്ടിടങ്ങളിൽ ബസ്​ നിർത്തേണ്ടിവരുന്നുണ്ട്​. 2015 ഫെബ്രുവരിയിൽ അന്നത്തെ മുഖ്യമന്ത്രി ഉമ്മൻചാണ്ടിയാണ് ബസ് ബേ കം ഷോപ്പിങ് കോംപ്ലക്സ് ഉദ്ഘാടനം ചെയ്തത്. അന്ന് ബസ് ബേയുടെ നിർമാണം പൂർത്തിയായിരുന്നില്ല. പഞ്ചായത്ത് ഒാഫിസ് ഉൾപെടെ ഷോപ്പിങ് കോംപ്ലക്സ് പ്രവർത്തി​െച്ചങ്കിലും ബസ് ബേ വെറുതെ കിടക്കുകയായിരുന്നു. ബസുകൾ കയറുന്ന രീതിയിൽ നിലംനവീകരണം മാസങ്ങൾക്കുശേഷമാണ് ആരംഭിച്ചത്. നേരത്തെ മഴപെയ്ത് ചളിക്കുളമായിരുന്നു ഇത്​. ഗതാഗതക്കുരുക്കിലും അടിസ്ഥാനസൗകര്യങ്ങളുെട അഭാവത്താലും വീർപ്പുമുട്ടിയിരുന്ന മുട്ടിലി​െൻറ മുഖച്ഛായ മാറിയേക്കാവുന്ന പദ്ധതിയായിരുന്നു രണ്ടുവർഷത്തോളം ഉപയോഗപ്രദമല്ലാതെ കിടന്നത്. ഷോപ്പിങ് കോംപ്ലക്സിലേക്കുള്ള ബസ് ബേ നവീകരിക്കാത്തിനാൽ കട മുറികൾ ലേലത്തിനെടുത്തവരും ബുദ്ധിമുട്ടിലായി. കഴിഞ്ഞവർഷത്തെ മഴക്കാലത്ത് ഇവി​െട നിന്നുള്ള ചളി നിറഞ്ഞ് വാഹനം കാത്തുനിന്നവരും യാത്രക്കാരും ബുദ്ധിമുട്ടി. പിന്നീട് ഭരണസമിതി മാറിയപ്പോൾ ബസ് ബേയുടെ നിലം പാറപ്പൊടിയും മറ്റും ഇട്ടശേഷം വീണ്ടും ഉദ്ഘാടനം ചെയ്തെങ്കിലും ബസുകൾക്ക്​ പ്രവേശിക്കാൻ പ്രയാസമായിരുന്നു. അതും പൊളിച്ചുകളഞ്ഞ്​ വീണ്ടും വൻതുക ചെലവിട്ടാണ്​ ഇപ്പോഴത്തെ നവീകരണം. വൈകിയെങ്കിലും ഇപ്പോൾ മധ്യഭാഗത്തായി പുല്ലുപിടിപ്പിച്ചും നിലത്ത് സ്ലാബുകൾ പതിച്ചും മനോഹരമാക്കിയിട്ടുണ്ട്. ബസുകൾ ക‍യറുന്ന ഭാഗം കൂടി നവീകരിച്ചാൽ ഇപ്പോഴത്തെ പ്രശ്നം പരിഹരിക്കാനാകും.