വെ​ള്ള​മി​ല്ല, ഉ​ള്ള​ത് മ​ലി​നം; മം​ഗ​ല​ശ്ശേ​രി കോ​ള​നി പ​ക​ർ​ച്ച​വ്യാ​ധി ഭീ​ഷ​ണി​യി​ൽ

വെള്ളമുണ്ട: വേനൽ കടുത്തതോടെ കുടിവെള്ളക്ഷാമം രൂക്ഷമായ ആദിവാസി കോളനി പകർച്ചവ്യാധി ഭീഷണിയിൽ. വെള്ളമുണ്ട ഗ്രാമപഞ്ചായത്തിലെ മംഗലശ്ശേരി കോളനിയിലാണ് നീർച്ചാലിലുള്ള വെള്ളം കൂടി മലിനമായതോടെ ആരോഗ്യ ഭീഷണിയുയരുന്നത്. മലമുകളിലെ നീർച്ചാലിനെ ആശ്രയിച്ചാണ് ഈ ആദിവാസി കോളനിയിലെ 30ഒാളം കുടുംബങ്ങൾ ജീവിക്കുന്നത്. എന്നാൽ, നീർച്ചാലിലെ വെള്ളം വറ്റിയതോടെ ഈ കുടുംബങ്ങൾ ദുരിതത്തിലാണ്. നീർച്ചാലിൽ നിന്നും ഒഴുകിയെത്തുന്ന ജലം മലിനമായ നിലയിലാണ്. കുടിക്കാനും കുളിക്കാനും അലക്കാനും ഉപയോഗിക്കുന്ന നീർച്ചാലിനു താഴത്തെ കുഴിയിലെ വെള്ളമാണ് ഉപയോഗിക്കാൻ കഴിയാത്തവിധം മലിനമായി കിടക്കുന്നത്. വെള്ളത്തിന് മറ്റ് മാർഗങ്ങൾ ഇല്ലാത്തതിനാൽ ഈ മലിനജലമാണ് കോളനിക്കാർ ഉപയോഗിക്കുന്നത്. ഇത് വൻ ആരോഗ്യഭീഷണി ഉയർത്തുകയാണ്.