സര്‍ക്കാര്‍ ഓഫിസുകളില്‍ വെള്ളമില്ല

പുല്‍പള്ളി: ഗ്രാമപഞ്ചായത്തിലെ പല സര്‍ക്കാര്‍ ഓഫിസുകളും വെള്ളമില്ലാതെ ദുരിതത്തില്‍. പുല്‍പള്ളി കൃഷിഭവന്‍, മൃഗാശുപത്രി, സാമൂഹിക ക്ഷേമ വകുപ്പ് ഓഫിസ്, ഹോമിയോ ആശുപത്രി എന്നിവിടങ്ങളിലാണ് വെള്ളമില്ലാത്തത്. ഇവയെല്ലാം പുല്‍പള്ളി പഞ്ചായത്ത് വിട്ടുനല്‍കിയ സ്ഥലത്ത് നിര്‍മിച്ച കെട്ടിടത്തിലാണ് പ്രവര്‍ത്തിക്കുന്നത്. അടുത്തടുത്തായുള്ള ഈ ഓഫിസുകളിലേക്ക് വെള്ളം ഇതുവരെ ലഭിച്ചിരുന്നത് ഇവിടെയുള്ള കുഴല്‍ക്കിണറില്‍ നിന്നായിരുന്നു. സമീപകാലത്ത് കുഴല്‍ക്കിണറിലെ വെള്ളം വറ്റി. ഇതോടെ ജീവനക്കാര്‍ സമീപത്തുള്ള വീടുകളിലും മറ്റും പോയാണ് വെള്ളം കൊണ്ടുവരുന്നത്. മറ്റു കിണറുകളിലും വെള്ളം വറ്റിക്കൊണ്ടിരിക്കുകയാണ്. ഇക്കാരണത്താല്‍ പല വീടുകളില്‍പോയി വെള്ളം കൊണ്ടുവരേണ്ട ഗതികേടിലുമാണ് ജീവനക്കാര്‍. ഈ ഓഫിസുകളിലേക്ക് വെള്ളമത്തെിക്കാനായി ചെറുപദ്ധതി ജലനിധിയെ ഏല്‍പിച്ചിരുന്നു. ഇതിനായി കുഴല്‍ക്കിണറും ടാങ്കുമെല്ലാം സ്ഥാപിച്ചെങ്കിലും തുടര്‍ പ്രവൃത്തികള്‍ ഉണ്ടായില്ല. ഇതാണ് ഇപ്പോഴത്തെ കുടിവെള്ള ക്ഷാമത്തിന് കാരണം. വരള്‍ച്ച കനത്തതോടെ മേഖലയിലെ ജലസ്രോതസ്സുകളെല്ലാം വറ്റിത്തുടങ്ങിയിരിക്കുന്നു. കുടിവെള്ള പദ്ധതികളുടെ പൂര്‍ത്തീകരണം അതിന് ആനുപാതികമായി നടക്കുന്നുമില്ല.