ഓണത്തിന് അരിയില്ല; തിരുവോണ നാളില്‍ എം.എസ്.എഫ് അരി വിതരണം

കല്‍പറ്റ: ഓണത്തിന് സ്കൂള്‍ വിദ്യാര്‍ഥികള്‍ക്ക് സാധാരണ നല്‍കിക്കൊണ്ടിരുന്ന അരി വിതരണം മുടങ്ങിയതില്‍ പ്രതിഷേധിച്ച് എം.എസ്.എഫ് ജില്ലാ കമ്മിറ്റിയുടെ നേതൃത്വത്തില്‍ അരി വിതരണം നടത്തി. ഏറെ കൊട്ടിഘോഷിച്ച് അധികാരത്തിലേറിയ സര്‍ക്കാര്‍ പൊതുവിദ്യാഭ്യാസ രംഗത്തെ പാടെ അവഗണിക്കുകയാണ്. പാഠപുസ്തക വിതരണം, യൂനിഫോം വിതരണം, അരി വിതരണം തുടങ്ങി എല്ലാ മേഖലകളിലും സര്‍ക്കാര്‍ നിഷ്ക്രിയ നിലപാടാണ് സ്വീകരിക്കുന്നതെന്നും സമരക്കാര്‍ ആരോപിച്ചു. പൊഴുതന അച്ചൂര്‍ സ്കൂളിലെ കുട്ടികള്‍ക്ക് നല്‍കി എം.എസ്.എഫ് സംസ്ഥാന ജനറല്‍ സെക്രട്ടറി എം.പി. നവാസ് ഉദ്ഘാടനം ചെയ്തു. ജില്ലാ പ്രസിഡന്‍റ് വി.പി.സി. ലുഖ്മാനുല്‍ ഹക്കീം അധ്യക്ഷത വഹിച്ചു. മുസ്ലിം ലീഗ് പഞ്ചായത്ത് പ്രസിഡന്‍റ് നാസര്‍ കാതിരി, ജനറല്‍ സെക്രട്ടറി കെ.കെ. ഹനീഫ, ടി.കെ. ഹംസ, എം.പി. ഹഫീസലി, ഷിഹാബ് കാര്യകത്ത്, അസറുദ്ദീന്‍ കല്ലായ്, എം.പി. നിയാസ്, ടി. നാസര്‍, അന്‍വര്‍, മുഹമ്മദലി, പി. മുസ്തഫ, കെ.കെ. അബ്ദുല്‍ കരീം, മുസ്തഫ, എം.ആര്‍. നൗഷാദ്, എന്‍.കെ. അയ്യൂബ്, കെ. തൗഫീഖ്, കെ.വി. അജ്മല്‍ എന്നിവര്‍ സംബന്ധിച്ചു. ജനറല്‍ സെക്രട്ടറി റിയാസ് കല്ലുവയല്‍ സ്വാഗതം പറഞ്ഞു.