കൃഷിഭവനുകള്‍ നല്‍കുന്നത് മോശം മരുന്നുകള്‍

മാനന്തവാടി: കൃഷിഭവനില്‍നിന്ന് വിതരണം ചെയ്യുന്ന മരുന്നുകള്‍ ഗുണന്മേമയില്ലാത്തതും കൃഷിക്ക് ദോഷം വരുത്തുന്നതുമാണെന്ന് വ്യാപക പരാതി ഉയര്‍ന്ന സാഹചര്യത്തില്‍ തിരുനെല്ലി പഞ്ചായത്തിലെ കുരുമുളക് സമിതികളുടെ ആഭിമുഖ്യത്തില്‍ പ്രക്ഷോഭ പരിപാടികള്‍ നടത്തുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ഇതിനായി തിരുനെല്ലി പഞ്ചായത്ത് കാര്‍ഷിക സംരക്ഷണ സമിതിക്ക് രൂപം കൊടുത്തു. കൃഷിഭവന്‍ വിതരണം ചെയ്ത ഡോളമെറ്റ്, വേപ്പിന്‍ പിണ്ണാക്ക് എന്നിവ ഉപയോഗിച്ച കുരുമുളക് വള്ളികള്‍ ഉണങ്ങുന്നതായി നിരവധി പരാതികള്‍ ലഭിച്ചിരുന്നു. ഈ സാഹചര്യത്തില്‍ കൃഷിക്കാര്‍ക്ക് സര്‍ക്കാര്‍ നല്‍കുന്ന ആനുകൂല്യങ്ങള്‍ കര്‍ഷകനെ വിശ്വാസത്തിലെടുത്ത് പണമായി നല്‍കണം. ഉദ്യോഗസ്ഥരുടെ തട്ടിപ്പിനെക്കുറിച്ച് വകുപ്പ് മന്ത്രിക്കും വിജിലന്‍സിനും പരാതി നല്‍കുമെന്നും പ്രക്ഷോഭ പരിപാടികള്‍ക്ക് രൂപം നല്‍കാനായി ഈ മാസം നാലിന് പാടശേഖര സമിതികളെ കൂടി പങ്കെടുപ്പിച്ച് യോഗം ചേരുമെന്നും ഭാരവാഹികള്‍ പറഞ്ഞു. വാര്‍ത്താസമ്മേളനത്തില്‍ ടി.സി. ജോസഫ്, റാല്‍ ഡോള്‍ഫ്, എന്‍. ദേവദാസ് എന്നിവര്‍ പങ്കെടുത്തു.