സൗജന്യ ഏകജാലക രജിസ്ട്രേഷനുമായി ജില്ലാ പഞ്ചായത്തിന്‍െറ മിഷന്‍ പ്ളസ് വണ്‍ നാളെ മുതല്‍

കല്‍പറ്റ: ഹയര്‍ സെക്കന്‍ഡറി ഏകജാലക ഓണ്‍ലൈന്‍ രജിസ്ട്രേഷന്‍ നടത്തുന്നതിന് സൗജന്യ സേവനം നല്‍കുന്ന വയനാട് ജില്ലാ പഞ്ചായത്തിന്‍െറ നൂതന പദ്ധതിയായ മിഷന്‍ പ്ളസ് വണിന് തിങ്കളാഴ്ച തുടക്കമാകുമെന്ന് അധികൃതര്‍ വാര്‍ത്താസമ്മേളനത്തില്‍ അറിയിച്ചു. ജില്ലയിലെ പത്താംതരം പൂര്‍ത്തിയാക്കിയ വിദ്യാര്‍ഥികളുടെയും രക്ഷിതാക്കളുടെയും ആശങ്കയകറ്റി പ്ളസ് വണ്‍ പ്രവേശം സാധ്യമാക്കുകയാണ് പദ്ധതിയുടെ ലക്ഷ്യം. പട്ടികവര്‍ഗ വികസന വകുപ്പ്, ട്രൈബല്‍ വയനാട് എന്നിവയുടെ സഹകരണത്തോടെ ജില്ലാ ഹയര്‍ സെക്കന്‍ഡറി വിദ്യാഭ്യാസ വകുപ്പ് കരിയര്‍ ഗൈഡന്‍സ് ആന്‍ഡ് അഡോളസെന്‍റ് കൗണ്‍സലിങ് സെല്ലാണ് പദ്ധതി നടപ്പാക്കുന്നത്. ജില്ലാ പഞ്ചായത്തിന്‍െറ 2016ലെ ബജറ്റിലുള്‍പ്പെടുത്തിയ പ്രത്യേക പദ്ധതിയാണിത്. പത്താം തരം പൂര്‍ത്തിയാക്കിയ പട്ടികവര്‍ഗ-പട്ടികജാതി-മറ്റു പിന്നാക്ക വിഭാഗങ്ങളിലേതടക്കം മുഴുവന്‍ വിദ്യാര്‍ഥികളുടെയും ഹയര്‍ സെക്കന്‍ഡറി ഓണ്‍ലൈന്‍ രജിസ്ട്രേഷന്‍ പദ്ധതിയിലൂടെ പൂര്‍ത്തിയാക്കും. ഓണ്‍ലൈന്‍ രജിസ്ട്രേഷന്‍ ചെയ്യാതിരിക്കുന്നതിനാലും രജിസ്ട്രേഷന്‍ നടത്തുമ്പോള്‍ സംഭവിക്കുന്ന തെറ്റുകള്‍ കാരണവും നിരവധി വിദ്യാര്‍ഥികള്‍ക്കാണ് ഓരോ വര്‍ഷവും പ്ളസ് വണ്‍ അഡ്മിഷന്‍ നഷ്ടമാകുന്നത്. ഇതൊഴിവാക്കി കൃത്യമായി രജിസ്ട്രേഷന്‍ പൂര്‍ത്തീകരിക്കുന്നതിന് ഹയര്‍ സെക്കന്‍ഡറി കരിയര്‍-സൗഹൃദ കോഓഡിനേറ്റര്‍മാരുടെയും അധ്യാപകരുടെയും സേവനം ലഭ്യമാക്കും. കൂടാതെ, രജിസ്ട്രേഷന്‍ നടത്തുന്നതിന് വിദ്യാര്‍ഥികള്‍ക്ക് ധാരാളം പണം ആവശ്യമായി വരുന്നിടത്ത് പദ്ധതിയിലൂടെ സൗജന്യ സേവനം ലഭിക്കുമ്പോള്‍ രക്ഷിതാക്കള്‍ക്കും ആശ്വാസമാകും. ജില്ലയിലെ മുഴുവന്‍ മുനിസിപ്പല്‍ കേന്ദ്രങ്ങളിലും പിന്നാക്ക പ്രദേശങ്ങളിലും സേവനം ലഭിക്കും. സേവനം നല്‍കുന്നതിന് ഓരോ സെന്‍ററുകളിലും അസാപ് ഫ്രണ്ട് ഓഫിസ് ട്രെയ്നികളെ നിയോഗിച്ചിട്ടുണ്ട്. ഹയര്‍ സെക്കന്‍ഡറി കോഴ്സുകള്‍ തെരഞ്ഞെടുക്കുമ്പോള്‍ ശ്രദ്ധിക്കേണ്ട കാര്യങ്ങളും ഉപരിപഠന സാധ്യതകള്‍ സംബന്ധിച്ച വിവരങ്ങളും ഈ കേന്ദ്രങ്ങളില്‍ ലഭ്യമാകും. ആദിവാസി വിഭാഗത്തില്‍പെട്ട കുട്ടികളുടെ പ്രവേശം ഉറപ്പാക്കുന്നതിന് പട്ടികവര്‍ഗ വികസന വകുപ്പിന്‍െറയും സന്നദ്ധ സാമൂഹിക പ്രവര്‍ത്തകരുടെയും ട്രൈബല്‍ പ്രമോട്ടര്‍മാരുടെയും സേവനം ഉറപ്പാക്കിയിട്ടുണ്ട്. മാര്‍ച്ച് 31വരെ അപേക്ഷിക്കാം. ട്രയല്‍ അലോട്ട്മെന്‍റ് ജൂണ്‍ ഏഴിനും ആദ്യ അലോട്ട്മെന്‍റ് ജൂണ്‍ 13നും പ്രസിദ്ധീകരിക്കും. പ്ളസ് വണ്‍ ക്ളാസുകള്‍ ജൂലൈ ആദ്യവാരം ആരംഭിക്കും. ജില്ലാ പഞ്ചായത്ത് പ്രസിഡന്‍റ് ടി. ഉഷാകുമാരി, വൈസ് പ്രസിഡന്‍റ് പി.കെ. അസ്മത്ത്, വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്സന്‍ എ. ദേവകി എന്നിവരാണ് പദ്ധതിയുടെ രക്ഷാധികാരികള്‍. ഹയര്‍ സെക്കന്‍ഡറി ജില്ലാ കോഓഡിനേറ്റര്‍ താജ് മന്‍സൂര്‍, പ്രിന്‍സിപ്പല്‍മാരായ കെ.കെ. വര്‍ഗീസ്, എം. അബ്ദുല്‍ അസീസ്, ഷൈമ ടി. ബെന്നി, എ.കെ. കരുണാകരന്‍, യു.സി. ചന്ദ്രിക, സുധാദേവി, കോഓഡിനേറ്റര്‍മാരായ സി.ഇ. ഫിലിപ്, കെ.ബി. സിമില്‍, ട്രെയ്നര്‍ മനോജ് ജോണ്‍ എന്നിവരാണ് മോണിറ്ററിങ് സമിതി അംഗങ്ങള്‍. പദ്ധതിയുടെ ബ്രോഷര്‍ ജില്ലാ പഞ്ചായത്ത് പ്രസിഡന്‍റ് ടി. ഉഷാകുമാരി പ്രകാശനം ചെയ്തു.