ശമ്പളവും ആനുകൂല്യവും ലഭിക്കുന്നില്ളെന്ന് പരാതി

പുല്‍പള്ളി: 2014-15, 2015-16 അധ്യയന വര്‍ഷങ്ങളില്‍ ആരംഭിച്ച എയ്ഡഡ് ഹയര്‍സെക്കന്‍ഡറി ബാച്ചുകളിലെ 2600ഓളം വരുന്ന അധ്യാപകരും 500ഓളം വരുന്ന ലാബ് അറ്റന്‍റര്‍മാരും ഹയര്‍സെക്കന്‍ഡറി സ്കൂളുകളില്‍ തസ്തിക നിര്‍ണയം നടത്താത്തതിന്‍െറ പേരില്‍ ശമ്പളമോ മറ്റ് ആനുകൂല്യങ്ങളോ ലഭിക്കാതെ നരകിക്കുന്നു. ഈ ബാച്ചുകളില്‍ കഴിഞ്ഞ വര്‍ഷം ഹയര്‍സെക്കന്‍ഡറി ഡയറക്ടറേറ്റിന്‍െറ ആഭിമുഖ്യത്തില്‍ സ്കൂള്‍ പരിശോധന നടത്തി വിദ്യാര്‍ഥികളുടെ എണ്ണവും തിട്ടപ്പെടുത്തിയിരുന്നു. എങ്കിലും തസ്തിക നിര്‍ണയം പൂര്‍ത്തിയാക്കാത്തതിനാല്‍ ഈ അധ്യാപകര്‍ക്ക് ഗെസ്റ്റ് വേതനം പോലും ലഭിക്കുന്നില്ല. ഇതോടൊപ്പം ആരംഭിച്ച ഗവ. ഹയര്‍ സെക്കന്‍ഡറി സ്കൂളുകളില്‍ അധ്യാപകര്‍ക്ക് ഗെസ്റ്റ് വേതനം നല്‍കുന്നുണ്ട്. മുന്‍ സര്‍ക്കാറിന്‍െറ കാലത്ത് ഈ പ്രശ്നത്തിന് പരിഹാരം കാണണമെന്നാവശ്യപ്പെട്ട് നിരവധി നിവേദനങ്ങള്‍ നല്‍കിയിട്ടും പരിഹാരമായില്ല. അധ്യാപകര്‍ക്ക് ശമ്പളമടക്കമുള്ള ആനുകൂല്യങ്ങള്‍ നല്‍കണമെന്ന് കേരള എയ്ഡഡ് ഹയര്‍സെക്കന്‍ഡറി ടീച്ചേഴ്സ് അസോസിയേഷന്‍ ജില്ലാ കമ്മിറ്റി ആവശ്യപ്പെട്ടു. ഈ ആവശ്യമുന്നയിച്ച് സി.കെ. ശശീന്ദ്രന്‍ എം.എല്‍.എക്ക് നിവേദനം നല്‍കി. അധ്യാപകരുടെ ന്യായമായ ആവശ്യത്തെ വിദ്യാഭ്യാസ മന്ത്രിയുടെ മുന്നിലും ധരിപ്പിക്കുമെന്ന് എം.എല്‍.എ ഉറപ്പുനല്‍കി. കെ.എ.എച്ച്.എസ്.ടി.എ ജില്ലാ പ്രസിഡന്‍റ് ജോസ് ആന്‍റണി, സെക്രട്ടറി പി.ജി. ദിനേഷ്കുമാര്‍, ട്രഷറര്‍ എം.സി. സാബു എന്നിവരുടെ നേതൃത്വത്തിലാണ് നിവേദനം നല്‍കിയത്.