മാതമംഗലം വട്ടപ്പാടി കാട്ടുനായ്ക്ക കോളനിവാസികള്‍ക്ക് ദുരിത ജീവിതം

പുല്‍പള്ളി: വനത്തിന് നടുവിലെ മാതമംഗലം വട്ടപ്പാടി കാട്ടുനായ്ക്ക കോളനിവാസികളുടെ ജീവിതം ദുരിതപൂര്‍ണം. പുല്‍പള്ളി - ബത്തേരി റൂട്ടില്‍ പാമ്പ്രയ്ക്കടുത്താണ് കോളനി. പ്രധാന റോഡില്‍നിന്ന് രണ്ട് കിലോമീറ്റര്‍ കൊടും വനത്തില്‍കൂടി നടന്നുവേണം കോളനിയിലത്തൊന്‍. വനത്തിന് നടുവിലായിട്ടും കോളനിവാസികളുടെ സംരക്ഷണത്തിന് വനാതിര്‍ത്തിയില്‍ വന്യജീവി പ്രതിരോധ സംവിധാനങ്ങള്‍ ഒരുക്കിയിട്ടില്ല. ഫെന്‍സിങ്ങും ട്രഞ്ചുമെല്ലാം തകര്‍ന്നുകിടക്കുന്നു. സന്ധ്യമയങ്ങുന്നതോടെ ആനകള്‍ കോളനിയിലത്തെുന്നു. കോളനിക്കുപുറമേ വലിച്ചുകെട്ടിയ കമ്പിയില്‍ കുറെ കുപ്പികള്‍ തൂക്കിയിട്ടാണ് ആനകളെ ഇവര്‍ ഓടിക്കുന്നത്. കുപ്പികള്‍ തമ്മിലടിക്കുമ്പോഴുണ്ടാകുന്ന ശബ്ദം കേട്ട് ആനകള്‍ മുമ്പെല്ലാം മടങ്ങുമായിരുന്നു. ഇപ്പോള്‍ ഇതെല്ലാം മറികടന്നാണ് ആനകള്‍ കോളനിയിലേക്കത്തെുന്നത്. ഇവിടെ വാസയോഗ്യമായ വീടുകള്‍ കുറവാണ്. പ്ളാസ്റ്റിക് ഷീറ്റ് മറച്ചുകെട്ടിയ വീടുകളാണ് ഭൂരിഭാഗവും. കഴിഞ്ഞ ദിവസം കോളനിയിലെ മിനി, ബസവി എന്നിവരുടെ വീടുകള്‍ ആന തകര്‍ത്തു. മിനിയുടെ വീടിനോട് ചേര്‍ന്നുണ്ടായിരുന്ന തൊഴുത്തും ആന തകര്‍ത്തു. പശുവിനും ഗുരുതര പരിക്കേറ്റു. 80 കാരിയായ ബസവി ഭാഗ്യംകൊണ്ടാണ് രക്ഷപ്പെട്ടത്. കുട്ടികളെ വിദ്യാലയത്തില്‍ വിടാനും രാവിലെ പാല്‍ കൊണ്ടുപോകുവാനും ഭയക്കുകയാണ് കോളനിവാസികള്‍. മുമ്പ് ആനയുടെ ആക്രമണത്തില്‍ ഒരാള്‍ക്ക് ഗുരുതരമായി പരിക്കേറ്റിരുന്നു. ആനശല്യം രൂക്ഷമായതോടെ വാഹനങ്ങള്‍ വിളിച്ചാല്‍ ഈ വഴി വരാനും ആരും തയാറാകുന്നില്ല. ഇവരെ ഇവിടെനിന്നും പുനരധിവസിപ്പിക്കണമെന്നാണ് ആവശ്യം. ഭവന നിര്‍മാണം, കുടിവെള്ളം തുടങ്ങിയ അടിസ്ഥാന സൗകര്യ വികസനത്തിന് കോളനിയില്‍ പദ്ധതിയൊന്നും ഉണ്ടായിട്ടില്ല.