ന്യൂനപക്ഷ ഉദ്യോഗാര്‍ഥികള്‍ക്ക് സൗജന്യ പരിശീലനം

കല്‍പറ്റ: കര, നാവിക, വ്യോമസേന, അര്‍ധസൈനിക, പൊലീസ് വിഭാഗങ്ങളിലെ വിവിധ തസ്തികകളില്‍ ഉദ്യോഗം ലഭിക്കുന്നതിന് ന്യൂനപക്ഷ ഉദ്യോഗാര്‍ഥികള്‍ക്ക് സംസ്ഥാന ന്യൂനപക്ഷക്ഷേമ വകുപ്പിന് കീഴില്‍ സൗജന്യ പ്രീ റിക്രൂട്ട്മെന്‍റ് പരിശീലനം നല്‍കുന്നു. തികഞ്ഞ സൈനിക അച്ചടക്കത്തില്‍ രണ്ട് മാസത്തെ റെസിഡന്‍ഷ്യല്‍ പരിശീലനമാണ് നല്‍കുന്നത്. കോഴിക്കോട് പ്രീ റിക്രൂട്ട്മെന്‍റ് ട്രെയിനിങ് സെന്‍ററാണ് (പി.ആര്‍.ടി.സി) പരിശീലനം നടത്തുന്നത്. മുസ്ലിം, ക്രിസ്ത്യന്‍, സിഖ്, ബുദ്ധ, പാഴ്സി, ജൈന വിഭാഗങ്ങളിലെ 18നും 25നുമിടയില്‍ പ്രായമുള്ളവരില്‍നിന്നും തെരഞ്ഞെടുക്കുന്ന 200 പേര്‍ക്കാണ് പരിശീലനം. വയനാട്, കോഴിക്കോട്, കണ്ണൂര്‍, കാസര്‍കോട് ജില്ലകളിലുള്ളവര്‍ക്ക് കോഴിക്കോട് സിവില്‍ സ്റ്റേഷന് സമീപമുള്ള പി.ആര്‍.ടി.സിയില്‍ ജനുവരി 10ന് രാവിലെ ഒമ്പതിന് കൂടിക്കാഴ്ച നടത്തും. കുറഞ്ഞത് 167 സെന്‍റീമീറ്റര്‍ ഉയരവും പ്ളസ് ടു യോഗ്യതയും ഉള്ളവര്‍ എസ്.എസ്.എല്‍.സി, പ്ളസ് ടു എന്നിവയുടെ അസ്സല്‍ സര്‍ട്ടിഫിക്കറ്റ്, അവയുടെ സാക്ഷ്യപ്പെടുത്തിയ പകര്‍പ്പ്, തെരഞ്ഞെടുപ്പ് കമീഷന്‍ നല്‍കുന്ന തിരിച്ചറിയല്‍ കാര്‍ഡ്, രണ്ട് പാസ്പോര്‍ട്ട് സൈസ് ഫോട്ടോ സഹിതം കൂടിക്കാഴ്ചക്ക് എത്തണം. പരിശീലന പരിപാടിയില്‍ കായികക്ഷമത, എഴുത്തുപരീക്ഷ, കൂടിക്കാഴ്ച തുടങ്ങിയവ പ്രാപ്തമാക്കുന്ന പരിശീലനവും വ്യക്തിത്വ വികസനം, നിയമബോധവത്കരണം, പ്രഥമശുശ്രൂഷ എന്നിവക്കുള്ള ക്ളാസുകളും ഉള്‍പ്പെടുത്തിയിട്ടുണ്ട്. ക്ളാസുകള്‍ക്കും പരിശീലനത്തിനും അതത് മേഖലയിലെ വിദഗ്ധര്‍ നേതൃത്വം നല്‍കും. കൂടിക്കാഴ്ചയില്‍നിന്നും തെരഞ്ഞെടുക്കപ്പെടുന്ന ദാരിദ്ര്യരേഖക്ക് താഴെയുള്ള ഉദ്യോഗാര്‍ഥികള്‍ക്ക് മുന്‍ഗണന നല്‍കും. ഫോണ്‍: 0471 2302090, 9447469280.