കരിങ്കണ്ണി കോളനിക്കാരുടെ സ്വപ്നം സഫലമാകുന്നു; വീട് നിര്‍മാണം പുരോഗമിക്കുന്നു

തരിയോട്: പടിഞ്ഞാറത്തറ കരിങ്കണ്ണി കോളനിയില്‍നിന്നും കുടിയേറിപാര്‍പ്പിച്ച ആദിവാസി കുടുംബങ്ങള്‍ക്ക് പുനരധിവാസഭൂമിയിലെ ജീവിതം പൂവണിയുന്നു. മിക്ക കുടുംബങ്ങള്‍ക്കും ഒരുവര്‍ഷത്തിനുള്ളില്‍ തന്നെ സര്‍ക്കാര്‍ വീടുകള്‍ അനുവദിച്ചതാണ് ആദിവാസി കുടുംബങ്ങളെ സന്തോഷിപ്പിക്കുന്നത്. കഴിഞ്ഞവര്‍ഷം ജനുവരിയിലാണ് സൗത് വയനാട് ഡിവിഷന്‍െറ പടിഞ്ഞാറത്തറ ഫോറസ്റ്റിനോടു ചേര്‍ന്ന് വര്‍ഷങ്ങളായി താമസിച്ചിരുന്ന 15ഓളം കാട്ടുനായ്ക്ക കുടുംബങ്ങളെ സര്‍ക്കാര്‍ തരിയോട് പഞ്ചായത്തിലെ പത്താംമൈല്‍ പ്രദേശത്ത് പുനരധിവസിപ്പിച്ചത്. പതിറ്റാണ്ട് കാലം ഉള്‍വനത്തില്‍ തേന്‍, തെള്ളി, നെല്ലിക്ക, ചൂരല്‍ തുടങ്ങിയ വനവിഭവങ്ങള്‍ ശേഖരിച്ച് വില്‍പന നടത്തിയാണ് ഇവര്‍ വസിച്ചിരുന്നത്. ആനശല്യവും അടിസ്ഥാനസൗകര്യങ്ങളുടെ പ്രശ്്നവും മാവോവാദി ഭീഷണിയുംമൂലം ഇവര്‍ ദുരിതമനുഭവിച്ചിരുന്നു. ഇതോടെയാണ് ‘ആശിക്കുംഭൂമി ആദിവാസികള്‍ക്ക്’ എന്ന പദ്ധതിയിലുള്‍പ്പെടുത്തി ഓരോ കുടുംബത്തിനും തരിയോട് പഞ്ചായത്തിലെ പത്താംമൈല്‍ ബൈബ്ള്‍ ലാന്‍ഡ് പ്രദേശത്ത് 35 സെന്‍റ് വീതം ഭൂമി സര്‍ക്കാര്‍ നല്‍കിയത്. ട്രൈബല്‍ വകുപ്പുവഴി ഒരോ കുടുംബത്തിനും താമസിക്കുന്നതിന് ഷെഡുണ്ടാക്കാന്‍ തുടക്കത്തില്‍ 30,000 രൂപവീതം നല്‍കുകയും ചെയ്തിരുന്നു. ഇപ്പോള്‍ കാട്ടുനായ്ക്ക പാക്കേജ് പ്രകാരം ഓരോ കുടുംബത്തിനും മൂന്നരലക്ഷം രൂപ ചെലവില്‍ വീടുകള്‍ക്ക് ഫണ്ട് അനുവദിച്ചു. വീടുകളുടെ നിര്‍മാണം തുടങ്ങുകയും ചെയ്തിട്ടുണ്ട്. വീടുകളുടെ പണി വേഗത്തില്‍ പൂര്‍ത്തിയായാല്‍ ഈ വരുന്ന മഴക്കുമുമ്പേ കയറിക്കൂടാന്‍ കഴിയുമെന്ന വിശ്വാസത്തിലാണ് കുടുംബങ്ങള്‍.