നോട്ടുനിരോധനം: ഇഞ്ചി കര്‍ഷകര്‍ പ്രക്ഷോഭത്തിലേക്ക്

കല്‍പറ്റ: കേന്ദ്ര സര്‍ക്കാറിന്‍െറ നോട്ടുനിരോധനംമൂലം തകര്‍ന്നുകൊണ്ടിരിക്കുന്ന ഇഞ്ചി കാര്‍ഷികമേഖലയെ രക്ഷപ്പെടുത്തുന്നതിന് നടപടി സ്വീകരിക്കണമെന്നാവശ്യപ്പെട്ട് ഇഞ്ചികര്‍ഷകര്‍ പ്രക്ഷോഭത്തിനൊരുങ്ങുന്നതായി ജിഞ്ചര്‍ ഗ്രോവേഴ്സ് അസോസിയേഷന്‍ ഭാരവാഹികള്‍ വാര്‍ത്തസമ്മേളനത്തില്‍ അറിയിച്ചു. ഡിസംബര്‍ 22ന് രാവിലെ 10ന് സുല്‍ത്താന്‍ ബത്തേരി കോട്ടക്കുന്നില്‍ ഇഞ്ചികര്‍ഷകരുടെ പ്രതിഷേധ റാലി ആരംഭിക്കും. സ്വതന്ത്ര മൈതാനിയിലാണ് പൊതുസമ്മേളനം നടക്കുക. സ്വന്തം അക്കൗണ്ടിലുള്ള പണം പിന്‍വലിക്കുന്നതിനുപോലും നിയന്ത്രണം ഏര്‍പ്പെടുത്തിയതിനാല്‍ ഇതരസംസ്ഥാന ഇഞ്ചി കര്‍ഷകര്‍ക്ക് അടുത്ത വിളവിറക്കിന് ഭൂമി പാട്ടത്തിനെടുക്കല്‍, വിത്ത്, വളം, പണിക്കൂലി തുടങ്ങിയ ആവശ്യങ്ങള്‍ക്ക് പണം ലഭ്യമാവാത്ത സാഹചര്യമാണുള്ളതെന്ന് അവര്‍ പറഞ്ഞു. ഇതുമൂലം കര്‍ഷകര്‍ കൃഷി ഉപേക്ഷിക്കുന്ന സാഹചര്യമാണുള്ളത്. നോട്ടുനിരോധനംമൂലം ഇഞ്ചിക്ക് വിലയിടിഞ്ഞതും തിരിച്ചടിയായിരിക്കുകയാണെന്നും അവര്‍ പറഞ്ഞു. സാധാരണ നെല്ലുകൊയ്ത പാടങ്ങളില്‍ ഉഴുതുമറിച്ച് ഇഞ്ചികൃഷി നടാറുണ്ട്. പക്ഷേ, ഇപ്പോള്‍ പാടങ്ങള്‍ പൂട്ടാതെയിട്ടിരിക്കുന്നത് ഇഞ്ചികര്‍ഷകര്‍ കൃഷി നടത്തുന്നതില്‍നിന്ന് പിന്‍വലിഞ്ഞതിന്‍െറ സൂചനയാണെന്ന് അവര്‍ പറഞ്ഞു. വാര്‍ത്താസമ്മേളനത്തില്‍ സ്വാഗതസംഘം ചെയര്‍മാന്‍ മോഹന്‍ നവരംഗ്, കണ്‍വീനര്‍ വി.യു. ജോസഫ്, അഡ്വ. സി.യു. ജോണി, വര്‍ഗീസ് പി.വി, വി.വി. ജോയ്, വി.എം. ശിവരാജന്‍ എന്നിവര്‍ സംബന്ധിച്ചു.