അനധികൃത പാര്‍ക്കിങ് : എട്ടേനാല്‍ ടൗണ്‍ ഗതാഗതക്കുരുക്കില്‍

വെള്ളമുണ്ട: അനധികൃത വാഹന പാര്‍ക്കിങ് കാരണം എട്ടേനാല്‍ ടൗണില്‍ ഗതാഗത തടസ്സം പതിവാകുന്നു. റോഡിന്‍െറ ഇരുവശങ്ങളിലും സ്വകാര്യ വാഹനങ്ങളുടെയും ചരക്ക് വാഹനങ്ങളുടെയും പാര്‍ക്കിങ്ങാണ് ഇതിന് ഇടയാക്കുന്നത്. രാവിലെ മുതല്‍ ഒരു നിയന്ത്രണവുമില്ലാതെയാണ് വാഹനങ്ങള്‍ റോഡരികില്‍ നിര്‍ത്തിയിടുന്നത്. ഇടുങ്ങിയ റോഡിന്‍െറ ഇരുവശത്തും വലിയ വാഹനങ്ങളടക്കം നിര്‍ത്തിയിടുമ്പോള്‍ മറ്റ് വാഹനങ്ങള്‍ ഗതാഗതക്കുരുക്കില്‍പെട്ട് ഉഴലുകയാണ്. കോഴിക്കോട് ജില്ലയുമായും ബാണാസുര ഡാമുമായും ബന്ധപ്പെടുന്ന റോഡായതിനാല്‍ ദിനംപ്രതി നൂറുകണക്കിന് വാഹനങ്ങള്‍ ഒരേസമയം കടന്നുപോകുന്നുണ്ട്. ഓട്ടോ സ്റ്റാന്‍ഡില്‍ ഉള്‍ക്കൊള്ളാന്‍ പറ്റുന്നതിലും അധികം ഓട്ടോറിക്ഷകള്‍ കൂടിയുള്ള ടൗണാണിത്. പാര്‍ക്കിങ്ങിന് സൗകര്യമില്ലാത്തതിനാല്‍ ടൗണിന്‍െറ പലഭാഗത്തും റോഡിന്‍െറ ഇരുവശത്തും ഓട്ടോറിക്ഷകള്‍ നിര്‍ത്തിയിടേണ്ടി വരുന്നതും ഗതാഗത തടസ്സത്തിന് കാരണമാകുന്നുണ്ട്. നോ പാര്‍ക്കിങ്ങിലടക്കം സ്വകാര്യ വാഹനങ്ങള്‍ തോന്നുംപടി നിര്‍ത്തിയിടുമ്പോഴും നടപടിയെടുക്കേണ്ട അധികൃതര്‍ ഉറക്കത്തിലാണ്. റോഡും നടപ്പാതയും വാഹനങ്ങള്‍ കൈയടക്കുമ്പോള്‍ വിദ്യാര്‍ഥികളടക്കമുള്ള കാല്‍നടയാത്രക്കാര്‍ ഏതുവഴി നടക്കണം എന്നറിയാതെ ദുരിതത്തിലാണ്.