മാവോവാദി ഭീഷണി: നീലഗിരിയില്‍ പൊലീസ് പരിശോധന ശക്തമാക്കി

ഗൂഡല്ലൂര്‍: കേരള-തമിഴ്നാട് അതിര്‍ത്തിയില്‍ മാവോവാദികളുടെ നുഴഞ്ഞുകയറ്റം തടയുന്നതിന്‍െറ ഭാഗമായി പൊലീസ് വനാതിര്‍ത്തികളില്‍ പരിശോധന ശക്തമാക്കി. നീലഗിരി എസ്.പി മുരളീരംഭയുടെ നേതൃത്വത്തില്‍ ഡിവൈ.എസ്.പിമാരായ ലക്ഷ്മണന്‍, കുമാര്‍ എന്നിവരടക്കമുള്ള നൂറിലേറെ പൊലീസ് സംഘമാണ് തിരച്ചില്‍ നടത്തുന്നത്. അതേസമയം, ജില്ലയുടെ ഒരു ഭാഗത്തും മാവോവാദി സാന്നിധ്യം സ്ഥിരീകരിക്കപ്പെട്ടിട്ടില്ല.നീലഗിരിയുടെ അതിര്‍ത്തി വനമേഖലയില്‍ മാവോവാദികള്‍ താവളമുറപ്പിക്കാന്‍ സാധ്യതയുണ്ടെന്ന രഹസ്യാന്വേഷണ വിഭാഗത്തിന്‍െറ മുന്നറിയിപ്പിന്‍െറ പശ്ചാത്തലത്തിലാണ് പരിശോധന തുടരുന്നതെന്നും പൊലീസ് മേധാവി വ്യക്തമാക്കി. മഞ്ചൂര്‍, അപ്പര്‍ഭവാനി, കേരകുന്ത, മുള്ളി, കിണ്ണക്കൊരൈ തുടങ്ങിയ വനാതിര്‍ത്തി മേഖലയിലെ ആദിവാസി ഗ്രാമങ്ങളിലും പൊലീസ് പരിശോധന ശക്തമാക്കി. മാവോവാദികള്‍ നീലഗിരിയിലേക്ക് കടന്നിട്ടുണ്ടെന്ന് വിവരം ലഭിച്ചതോടെയാണ് പരിശോധന വ്യാപകമാക്കിയത്. അതിര്‍ത്തി കടന്നുവരുന്ന വാഹനങ്ങളും പരിശോധനക്ക് വിധേയമാക്കിയാണ് കടത്തിവിടുന്നത്. പന്തല്ലൂര്‍, മഞ്ചൂര്‍ മേഖലയില്‍ തമിഴ്നാട് ദൗത്യസേനയും തിരച്ചില്‍ നടത്തുന്നുണ്ട്. വനപാലകരും ജാഗ്രതയിലാണ്. നീലഗിരി കടന്നതായി സംശയിക്കുന്ന മാവോവാദികളില്‍ ഏഴുപേരുണ്ടെന്നും രണ്ടുപേര്‍ സ്ത്രീകളുമാണെന്നാണ് പൊലീസിനു ലഭിച്ച വിവരം.