സര്‍ക്കാര്‍ ഓഫിസുകള്‍ സ്തംഭിപ്പിക്കും –ആക്ഷന്‍ കൗണ്‍സില്‍

മേപ്പാടി: ബുധനാഴ്ച മുഖ്യമന്ത്രിയുടെ സാന്നിധ്യത്തില്‍ തിരുവനന്തപുരത്ത് ചേരുന്ന പ്ളാന്‍േറഷന്‍ ലേബര്‍ കമ്മിറ്റിയിലും ഒത്തുതീര്‍പ്പുണ്ടായില്ളെങ്കില്‍ സര്‍ക്കാര്‍ ഓഫിസുകള്‍ സ്തംഭിപ്പിച്ചുകൊണ്ടുള്ള സമരമാരംഭിക്കുമെന്ന് ഐക്യ ട്രേഡ് യൂനിയന്‍ ആക്ഷന്‍ കൗണ്‍സില്‍ ഭാരവാഹികള്‍ സൂചന നല്‍കി. സര്‍ക്കാറിനുമേല്‍ കൂടുതല്‍ സമ്മര്‍ദം ചെലുത്തുകയെന്ന ലക്ഷ്യത്തോടെയാണിത്. തിരക്കുള്ള ഹൈവേ-അന്തര്‍സംസ്ഥാന പാതകള്‍ ഉപരോധിച്ചുകൊണ്ടുള്ള സമരം തുടരുന്നത് ജനങ്ങള്‍ക്കേറെ ബുദ്ധിമുട്ടുണ്ടാക്കുകയും ജനാഭിപ്രായം സമരത്തിനെതിരാകുമെന്നും കണ്ടുകൊണ്ടാണ് സമരം സര്‍ക്കാര്‍ ഓഫിസുകള്‍ക്കു മുന്നിലേക്ക് വ്യാപിപ്പിക്കുന്നത്. സര്‍ക്കാര്‍ ഓഫിസുകള്‍ സ്തംഭിപ്പിക്കുന്ന സമരത്തിന് സംയുക്ത ആക്ഷന്‍ കൗണ്‍സില്‍ തീരുമാനമെടുത്തിട്ടുണ്ടെന്ന് ഐ.എന്‍.ടി.യു.സി ജില്ലാ ജനറല്‍ സെക്രട്ടറി ബി. സുരേഷ്ബാബു പറഞ്ഞു. 20 ശതമാനം ബോണസ് ആവശ്യപ്പെട്ട് സെപ്റ്റംബര്‍ 25ന് എച്ച്.എം.എല്‍ തോട്ടങ്ങളിലാണ് തൊഴിലാളിസമരം ആരംഭിച്ചത്. സെപ്റ്റംബര്‍ 28ന് സമരം മുഴുവന്‍ തോട്ടങ്ങളിലേക്കും വ്യാപിപ്പിച്ചു. 500 രൂപ ദിവസവേതനവും തൊഴിലാളി സംഘടനകള്‍ ആവശ്യപ്പെടുന്നുണ്ട്. ഇതിനിടയില്‍ പലപ്പോഴായി ചേര്‍ന്ന പ്ളാന്‍േറഷന്‍ ലേബര്‍ കമ്മിറ്റി യോഗങ്ങള്‍ അലസിയതിനെതുടര്‍ന്നാണ് സമരം തുടരുന്നത്. സമരം തോട്ടങ്ങളെയും തൊഴിലാളി കുടുംബങ്ങളെയും ബാധിച്ചുതുടങ്ങിയിട്ടുണ്ട്.