ബത്തേരി ഉപജില്ലാ സ്കൂള്‍ കലോത്സവം ഇന്നുമുതല്‍

സുല്‍ത്താന്‍ ബത്തേരി: വിദ്യാഭ്യാസ ഉപജില്ലാ സ്കൂള്‍കലോത്സവം, സംസ്കൃതോത്സവം, അറബിക് കലാമേള എന്നിവ നവംബര്‍ 30, ഡിസംബര്‍ ഒന്ന്, രണ്ട്, മൂന്ന്, നാല് തീയതികളില്‍ വടുവഞ്ചാല്‍ ഗവ. ഹയര്‍ സെക്കന്‍ഡറി സ്കൂളില്‍ നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. സ്റ്റേജിതര ഇനങ്ങള്‍ തിങ്കള്‍, ഡിസംബര്‍ ഒന്ന് തീയതികളിലും സ്റ്റേജിനങ്ങള്‍ ഡിസംബര്‍ രണ്ട്, മൂന്ന്, നാല് തീയതികളിലും നടക്കും. വടുവഞ്ചാല്‍ ഗവ. ഹയര്‍ സെക്കന്‍ഡറി സ്കൂളില്‍ സര്‍വിസിലിരിക്കെ മരിച്ച ടി. ജയശങ്കരന്‍ മാസ്റ്റര്‍, സുലേഖാബി ടീച്ചര്‍ എന്നിവരുടെ നാമധേയത്തിലുള്ള രണ്ടു നഗറുകളിലായാണ് കലോത്സവം. ജില്ലയിലെ പ്രധാന വിനോദസഞ്ചാര കേന്ദ്രങ്ങളുടെ പേരിലുള്ള 11 വേദികളിലായി നടക്കുന്ന മത്സരങ്ങളില്‍ ഉപജില്ലക്ക് കീഴിലെ 141 വിദ്യാലയങ്ങളില്‍നിന്നുള്ള 3482 പ്രതിഭകളാണ് മാറ്റുരക്കുക. ഡിസംബര്‍ രണ്ടിന് വൈകീട്ട് മൂന്നിന് സാംസ്കാരിക ഘോഷയാത്ര വടുവഞ്ചാല്‍ ടൗണില്‍നിന്നാരംഭിക്കും. തോമാട്ടുചാല്‍ ഗവ. ഹയര്‍ സെക്കന്‍ഡി സ്കൂള്‍ ഗ്രൗണ്ടിലെ പ്രധാനവേദിയില്‍ നടക്കുന്ന ചടങ്ങില്‍ ജില്ലാപഞ്ചായത്ത് പ്രസിഡന്‍റ് ടി. ഉഷാകുമാരി ഉദ്ഘാടനം നിര്‍വഹിക്കും. സാഹിത്യകാരന്‍ ഒ.കെ. ജോണി മുഖ്യാതിഥിയായിരിക്കും. അമ്പലവയല്‍ പഞ്ചായത്ത് പ്രസിഡന്‍റ് സീത വിജയന്‍ അധ്യക്ഷത വഹിക്കും. ബത്തേരി ബ്ളോക് പഞ്ചായത്ത് പ്രസിഡന്‍റ് ലത ശശി മുഖ്യപ്രഭാഷണം നടത്തും. സമാപനസമ്മേളനം ഡിസംബര്‍ നാലിന് വൈകീട്ട് നാലിന് ജില്ലാപഞ്ചായത്ത് വൈസ് പ്രസിഡന്‍റ് പി.കെ. അസ്മത്ത് ഉദ്ഘാടനം ചെയ്യും. പനമരം ബ്ളോക് പഞ്ചായത്ത് പ്രസിഡന്‍റ് ടി.എസ്. ദിലീപ്കുമാര്‍ മുഖ്യപ്രഭാഷണവും ബത്തേരി ബ്ളോക് പഞ്ചായത്ത് വൈസ് പ്രസിഡന്‍റ് സുരേഷ് താളൂര്‍ സമ്മാനദാനവും നിര്‍വഹിക്കും. എ.ഇ.ഒ എം.വി. മുരളീധരന്‍, ജോ. ജന. കണ്‍വീനര്‍ എന്‍.ടി. ജോണ്‍, പി.ടി.എ പ്രസിഡന്‍റ് അയൂബ് കടല്‍മാട്, പ്രോഗ്രാം കമ്മിറ്റി കണവീനര്‍ ടി. രാജന്‍, പബ്ളിസിറ്റി കണ്‍വീനര്‍ കെ.എസ്. മാഴ്സ് എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.