മാനഭംഗശ്രമം: യുവാവ് അറസ്റ്റില്‍

കല്‍പറ്റ: മാനഭംഗശ്രമത്തെ ചെറുത്ത വിദ്യാര്‍ഥിനിയെ കഴുത്തില്‍ തോര്‍ത്ത് മുറുക്കി കൊലപ്പെടുത്താന്‍ ശ്രമിച്ച കേസില്‍ യുവാവ് അറസ്റ്റില്‍. വെങ്ങപ്പള്ളി തെക്കുംതറ മഠത്തില്‍ കോളനിയിലെ ശശിയെയാണ് (37) കല്‍പറ്റ പൊലീസ് അറസ്റ്റ് ചെയ്തത്. കഴിഞ്ഞദിവസം വൈകീട്ടോടെയായിരുന്നു സംഭവം. സ്കൂള്‍ വിട്ട് വീട്ടിലേക്ക് മടങ്ങുകയായിരുന്ന 10ാം ക്ളാസുകാരിയെ തെക്കുംതറ കമല മന്ദിരം എസ്റ്റേറ്റിന് സമീപത്തെ ആളൊഴിഞ്ഞ സ്ഥലത്തുവെച്ച് ശശി മാനഭംഗപ്പെടുത്താന്‍ ശ്രമിക്കുകയായിരുന്നു. ഇത് കുട്ടി ചെറുത്തതോടെ കഴുത്തില്‍ തോര്‍ത്ത് മുറുക്കി കൊലപ്പെടുത്താന്‍ ശ്രമിക്കുകയായിരുന്നുവെന്ന് പൊലീസില്‍ നല്‍കിയ പരാതിയില്‍ പറയുന്നു. ശശിയുടെ കൈയില്‍ കടിച്ച് കുട്ടി രക്ഷപ്പെടുകയായിരുന്നു. പിന്നീട് നല്‍കിയ പരാതിയുടെ അടിസ്ഥാനത്തിലാണ് ശശിയെ കല്‍പറ്റ എസ്.ഐ രാമനുണ്ണിയും സംഘവും ചേര്‍ന്ന് അറസ്റ്റ് ചെയ്തത്. ശശിക്കെതിരെ പോക്സോ നിയമപ്രകാരവും ഇന്ത്യന്‍ ശിക്ഷാ നിയമം വകുപ്പ് 307 കൊലപ്പെടുത്താന്‍ ശ്രമം, 341 തടഞ്ഞുവെക്കല്‍, 354 എ, കൈക്ക് പിടിച്ച് മാനഹാനി വരുത്തല്‍ എന്നീ വകുപ്പുകള്‍ പ്രകാരവുമാണ് കേസെടുത്തിരിക്കുന്നത്. പ്രതിയെ ഞായറാഴ്ച കോടതിയില്‍ ഹാജറാക്കും.