തദ്ദേശ തെരഞ്ഞെടുപ്പ്: വോട്ടെണ്ണലിന് ഒരുക്കങ്ങളാവുന്നു

കല്‍പറ്റ: ജില്ലയിലെ തദ്ദേശ സ്വയംഭരണ തെരഞ്ഞെടുപ്പിന്‍െറ വോട്ടെണ്ണലിന് ഒരുക്കങ്ങളാവുന്നു. വോട്ടെണ്ണല്‍ കേന്ദ്രങ്ങള്‍ തഹസില്‍ദാര്‍മാരുടെ മേല്‍നോട്ടത്തില്‍ സജ്ജീകരിക്കും. 
ശനിയാഴ്ച രാവിലെ എട്ടിന് വോട്ടെണ്ണല്‍ തുടങ്ങും. ആദ്യം പോസ്റ്റല്‍ ബാലറ്റുകളാണ് എണ്ണിത്തുടങ്ങുക. റിട്ടേണിങ് ഓഫിസര്‍മാരാണ് ഇവ എണ്ണുക. പോസ്റ്റല്‍ ബാലറ്റുകള്‍ എണ്ണിത്തുടങ്ങിയാല്‍ ഇലക്ട്രോണിക് വോട്ടിങ് യന്ത്രങ്ങളിലും എണ്ണല്‍ തുടങ്ങും. 
എട്ടു പോളിങ് സ്റ്റേഷനുകള്‍ക്ക് ഒരു കൗണ്ടിങ് ടേബ്ള്‍ എന്ന വിധത്തിലാവും സജ്ജീകരിക്കുക. വോട്ടെണ്ണലിന്‍െറ പുരോഗതി സംസ്ഥാന തെരഞ്ഞെടുപ്പ് കമീഷന്‍െറ വെബ്സൈറ്റില്‍ അപ്ലോഡ് ചെയ്യാനുള്ള സൗകര്യവും കേന്ദ്രങ്ങളില്‍ ഏര്‍പ്പെടുത്തിയിട്ടുണ്ട്. 
വോട്ടെണ്ണലിന് മുന്നോടിയായി റിട്ടേണിങ് ഓഫിസര്‍മാര്‍ക്കും അസി. റിട്ടേണിങ് ഓഫിസര്‍മാര്‍ക്കുമുള്ള പരിശീലനം സിവില്‍ സ്റ്റേഷനില്‍ നടന്നു. ജില്ലാ കലക്ടര്‍ കേശവേന്ദ്ര കുമാര്‍, ഇലക്ഷന്‍ ഡെപ്യൂട്ടി കലക്ടര്‍ എ. ഉണ്ണികൃഷ്ണന്‍, റവന്യു ഇന്‍സ്പെക്ടര്‍ എം.കെ. ഹാരിഷ് എന്നിവര്‍ ക്ളാസെടുത്തു. എ.ഡി.എം പി.വി. ഗംഗാധരന്‍ സംബന്ധിച്ചു. വ്യാഴാഴ്ച രാവിലെ 10ന് കല്‍പറ്റ, പനമരം, സുല്‍ത്താന്‍ ബത്തേരി, മാനന്തവാടി എന്നീ കേന്ദ്രങ്ങളില്‍ കൗണ്ടിങ് ഉദ്യോഗസ്ഥര്‍ക്കുള്ള പരിശീലനം നടക്കും.