പനമരത്തിന് ഉത്സവമായി ഇല്‍ഫ വിവാഹസംഗമം

പനമരം: ‘ഇല്‍ഫ’ വിവാഹസെല്‍ സംഘടിപ്പിച്ച സമൂഹ വിവാഹസംഗമം പനമരത്തിന് ഉത്സവമായി. പനമരം പഞ്ചായത്തിലെ വിവിധ ഭാഗങ്ങളില്‍നിന്നുള്ള ആറു യുവതികളാണ് വിവാഹസംഗമത്തില്‍ പുതുജീവിതത്തിലേക്ക് കടന്നത്. ഞായറാഴ്ച രാവിലെ 10നാണ് ഉദ്ഘാടനച്ചടങ്ങുകള്‍ തുടങ്ങിയത്. സാധുക്കളെ സഹായിക്കാന്‍ സമ്പന്നര്‍ തയാറായാലെ നാടിന് നിലനില്‍പുള്ളൂ എന്ന് സംഗമം ഉദ്ഘാടനം ചെയ്ത പാണക്കാട് ഹമീദലി ശിഹാബ് തങ്ങള്‍ പറഞ്ഞു. ഇല്‍ഫ റിലീഫ് സെല്ലിന്‍െറ നന്മനിറഞ്ഞ പ്രവൃത്തി ജില്ലയൊട്ടാകെ വ്യാപിപ്പിക്കാന്‍ ശ്രമമുണ്ടാകണമെന്ന് ആശംസാപ്രസംഗം നടത്തിയ ജില്ലാ കലക്ടര്‍ കേശവേന്ദ്രകുമാര്‍ പറഞ്ഞു. റിലീഫ് സെല്‍ കണ്‍വീനര്‍ ടി.കെ. യൂനുസ്, ചെയര്‍മാന്‍ സി.എച്ച്. മമ്മുഹാജി, സി.എച്ച്. നവാസ്, പി.കെ. അസ്മത്ത്, റാഷിദ് കൂളിവയല്‍ എന്നിവര്‍ സംസാരിച്ചു. പനമരം മഹല്ല് ചെയര്‍മാന്‍ ഹംസ മുസ്ലിയാര്‍, സി.എച്ച്. അന്ത്രു, എം.കെ. അബൂബക്കര്‍ ഹാജി, പനമരം മഹല്ല് ഖാസി അഷ്റഫ് ദാരിമി, മൊയ്തീന്‍ മാസ്റ്റര്‍, എന്‍. കാദര്‍, കെ.സി. അബ്ദുല്ല, ഇ. കുഞ്ഞമ്മദ്, വി. ബഷീര്‍, ഇബ്രാഹീം മാസ്റ്റര്‍ കൂളിവയല്‍, ഇബ്രാഹീം ഹാജി കാപ്പുംചാല്‍, കെ.ടി. ഇസ്മായില്‍, പി.എന്‍. സിദ്ദീഖ്, അസൈനാര്‍ വെള്ളയില്‍ എന്നിവര്‍ നേതൃത്വം നല്‍കി.