മുറിച്ചുകടത്തിയ മരം പിടികൂടി; രണ്ടുപേര്‍ അറസ്റ്റില്‍

മാനന്തവാടി: സര്‍ക്കാര്‍ഭൂമിയില്‍നിന്ന് മുറിച്ചുകടത്തിയ മരം അതേസ്ഥലത്ത് കൊണ്ടുപോയി ഇടാന്‍ ശ്രമിക്കുന്നതിനിടെ നാട്ടുകാര്‍ പിടികൂടി പൊലീസില്‍ ഏല്‍പിച്ച രണ്ടുപേര്‍ അറസ്റ്റില്‍. ഒണ്ടയങ്ങാടി സ്വദേശികളായ കൊടിയംകുന്നേല്‍ ദേവസ്യ (59), കൊല്ലംമാട്ടേല്‍ ബാബു (51) എന്നിവരെയാണ് അറസ്റ്റ് ചെയ്തത്. മരവും കൊണ്ടുവരാനുപയോഗിച്ച പിക് അപ് വാനും പൊലീസ് കസ്റ്റഡിയിലെടുത്തു. കുഴിനിലം ആരോഗ്യ ഉപകേന്ദ്രത്തിന് മുന്നിലെ ഉണങ്ങിയ മഹാഗണി മരം മുറിച്ചുനീക്കാന്‍ ജെ.പി.എച്ച്.എന്‍ അധികൃതര്‍ക്ക് പരാതി നല്‍കിയിരുന്നു. ഇതനുസരിച്ചുള്ള നടപടിക്രമങ്ങള്‍ നടത്തിക്കൊണ്ടിരിക്കെ ദിവസങ്ങള്‍ക്കു മുമ്പാണ് മരം മുറിച്ചുകടത്തിയത്. സംഭവം വിവാദമായതോടെ ഞായറാഴ്ച വൈകുന്നേരം മരം കുഴിനിലത്തത്തെിച്ച് ഉപേക്ഷിക്കാന്‍ ശ്രമിക്കുന്നതിനിടെയാണ് നാട്ടുകാരുടെ ശ്രദ്ധയില്‍പെട്ടത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.