പൗരത്വ ഭേദഗതി നിയമം: മാധ്യമ പ്രവർത്തകരുടെ മാർച്ചിൽ ​പ്രതിഷേധമിരമ്പി

തിരുവനന്തപുരം: രാജ്യത്തെ വിഭജിക്കുന്ന പൗരത്വ ഭേദഗതി നിയമത്തിനും മംഗളൂരുവിൽ മാധ്യമപ്രവർത്തകരെ കസ്റ്റഡിയിലെടുത്തതിലും പ്രതിഷേധിച്ച് കെ.യു.ഡബ്ല്യു.ജെ ജില്ല കമ്മിറ്റിയുടെ ആഭിമുഖ്യത്തിൽ ജി.പി.ഒയിലേക്ക് മാധ്യമപ്രവർത്തകർ മാർച്ച് നടത്തി. പാളയം രക്തസാക്ഷി മണ്ഡപത്തിൽനിന്ന് രാവിലെ 11ഒാടെ ആരംഭിച്ച മാർച്ചിൽ വനിത മാധ്യമ പ്രവർത്തകരടക്കം നിരവധിപേർ അണിനിരന്നു. ജി.പി.ഒക്ക് മുന്നിൽ കെ.യു.ഡബ്ല്യു.ജെ സംസ്ഥാന ജനറൽ സെക്രട്ടറി ഇ.എസ്‌. സുഭാഷ്‌ ഉദ്‌ഘാടനം ചെയ്‌തു. പ്രസിഡൻറ് കെ.പി. റജി, മീഡിയ അക്കാദമി ചെയര്‍മാന്‍ ആര്‍.എസ്. ബാബു, മുന്‍ ചെയര്‍മാന്‍ എസ്.ആര്‍. ശക്തിധരന്‍, യൂനിയന്‍ മുന്‍ സംസ്ഥാന പ്രസിഡൻറ് ജേക്കബ് ജോര്‍ജ്, സണ്ണിക്കുട്ടി ഏബ്രഹാം, യൂനിയന്‍ ജില്ല പ്രസിഡൻറ് സുരേഷ് വെള്ളിമംഗലം, സെക്രട്ടറി ബി. അഭിജിത്, പ്രസ്ക്ലബ് സെക്രട്ടറി സാബ്ലു തോമസ്, സംസ്ഥാന കമ്മിറ്റി അംഗങ്ങളായ ആര്‍. കിരണ്‍ ബാബു, വിജേഷ് ചൂടല്‍, ഇയാസ് മുഹമ്മദ്, എ.വി. മുസാഫര്‍, ജില്ല ട്രഷറര്‍ അനുപമ ജി. നായര്‍, ഗീത നസീര്‍ എന്നിവർ സംസാരിച്ചു. തുടർന്ന് മാധ്യമ പ്രവർത്തകർ പൗരത്വ ഭേദഗതി നിയമം കത്തിച്ചു. തിരുവനന്തപുരത്ത്‌ രക്തസാക്ഷി മണ്ഡപത്തിൽ പുഷ്‌പാർച്ചന നടത്തിയാണ്‌ മാർച്ച്‌ ആരംഭിച്ചത്‌.