വീട്ടില്‍നിന്ന്​ കാണാതായ വയോധികന്‍ പരിക്കേറ്റ് ആശുപത്രിയില്‍

നേമം: വീട്ടില്‍നിന്ന് കാണാതായ വയോധികന്‍ പരിക്കേറ്റ് തിരുവനന്തപുരം ജനറല്‍ ആശുപത്രിയില്‍ ചികിത്സയില്‍. കൈമനം- തിരുവല്ലം റോഡില്‍ ആഴാങ്കല്ല് സ്വദേശി സുരേഷ്‌കുമാര്‍ (62) ആണ് അപകടത്തില്‍ പരിക്കേറ്റ് ഒമ്പതാം വാര്‍ഡില്‍ ചികിത്സയിലുള്ളത്. കഴിഞ്ഞ ആറ് മുതലാണ് ഇദ്ദേഹത്തെ കാണാതായത്. സംഭവത്തില്‍ വീട്ടുകാര്‍ കരമന പൊലീസില്‍ പരാതി നല്‍കിയിരുന്നു. വെളുത്ത മുണ്ടും നീല നിറമുള്ള ഷര്‍ട്ടും ധരിച്ച് വീട്ടില്‍നിന്ന് ഇയാള്‍ പുറത്തുപോകുന്ന ദൃശ്യം സമീപത്തെ സി.സി.ടി.വിയില്‍ പതിഞ്ഞിരുന്നു. പരാതിയില്‍ പൊലീസ് അന്വേഷണം നടത്തിവരുന്നതിനിടെയാണ് ഇയാള്‍ ആശുപത്രിയില്‍ ചികിത്സയിലുണ്ടെന്ന വിവരം ലഭിക്കുന്നത്. അല്‍ഷിമേഴ്‌സ് ബാധയ്‌ക്കൊപ്പം ചെറിയതോതില്‍ മാനസികപ്രശ്‌നവുമുള്ള ഇദ്ദേഹം റോഡിലൂടെ നടന്നുപോകുന്നതിനിടെ അജ്ഞാത വാഹനം തട്ടിയതാകാമെന്നാണ് നിഗമനം. സംഭവത്തില്‍ അന്വേഷണം ആരംഭിച്ചതായി കരമന എസ്.ഐ എസ്. സാഗര്‍ പറഞ്ഞു.