തുണിക്കടയിലെ ആക്രമണം; പ്രതിയെ റിമാന്‍ഡ് ചെയ്തു

നേമം: തുണിക്കടയില്‍ കയറി ഉടമയെയും മാതാവിനെയും ആക്രമിച്ച് പണം കവര്‍ന്ന സംഭവത്തില്‍ അറസ്റ്റിലായ പ്രതിയെ റിമാന്‍ഡ് ചെയ്തു. പാപ്പനംകോട് പൂഴിക്കുന്ന് സ്വദേശി ഊണ് രതീഷ് എന്നുവിളിക്കുന്ന രതീഷ് (38) ആണ് റിമാന്‍ഡിലായത്. ഇയാള്‍ കേസിലെ മൂന്നാംപ്രതിയാണ്. ഒന്നും രണ്ടും പ്രതികളായ കോലിയക്കോട് സ്വദേശി അരുണും പാപ്പനംകോട് പൂഴിക്കുന്ന് സ്വദേശി സജുവും നേരത്തെ പിടിയിലായിരുന്നു. ജൂലൈ 30 തിങ്കളാഴ്ചയായിരുന്നു സംഭവം. തൃക്കണ്ണാപുരം ജിതിന്‍ ഭവനില്‍ ബാബുവി‍ൻെറ മകന്‍ ജിതിന്‍ ബാബു(24)വിനെയും ഇയാളുടെ മാതാവിനെയുമാണ് മൂന്നംഗസംഘം കടയിലെത്തി ആക്രമിക്കുകയും പണംകവരുകയും ചെയ്തത്. വ്യക്തിവിരോധമായിരുന്നു ആക്രമണത്തില്‍ കലാശിച്ചത്. സംഭവത്തിനുശേഷം ഒളിവിലായിരുന്ന രതീഷിനെ നേമം എസ്.ഐ എസ്. സനോജും സംഘവുമാണ് പിടികൂടി കോടതിയില്‍ ഹാജരാക്കിയത്