നക്ഷത്ര ആമയെ വിൽക്കാന്‍ ശ്രമം; മൂന്നുപേർ പിടിയിൽ

പടം.... കാട്ടാക്കട: നക്ഷത്ര ആമയെ വിൽക്കാന്‍ ശ്രമിച്ച മൂന്നുപേരെ വനപാലക സംഘം അറസ്റ്റ് ചെയ്തു. തിരുമല തൃക്കണ്ണാപുരം പേരൂര്‍കോണം, കൃപാ ഭവനില്‍ എസ്. ബിജുമോന്‍ (42), ആര്യനാട് ഇരിഞ്ചല്‍, അനില്‍ ഭവനില്‍ ജെ. അനില്‍ കുമാര്‍ (42), കാട്ടാക്കട, കൊറ്റംപള്ളി, വെട്ടുവിളാകത്ത് റോഡരികത്തുവീട്ടില്‍ എ. നാണു (72) എന്നിവരെയാണ് ഇരിഞ്ചല്‍ സി.എസ്.ഐ പള്ളിക്കുസമീപമുള്ള പണിതീരാത്ത വീട്ടില്‍വെച്ച് പിടികൂടിയത്. 50 വയസ്സുള്ള പെണ്‍ വർഗത്തിൽപെട്ട നക്ഷത്ര ആമയെയാണ് വില്‍പനക്കായി കൊണ്ടുവന്നത്. പിടിയിലായവരെ നെടുമങ്ങാട് വനംകോടതിയിൽ ഹാജരാക്കി. പരുത്തിപ്പള്ളി റേഞ്ച് ഫോറസ്റ്റ് ഓഫിസറായ ആര്‍. വിനോദ്, ഡെപ്യൂട്ടി റേഞ്ച് ഫോറസ്റ്റ് ഓഫിസറായ ടി.എസ്. അഭിലാഷ് എന്നിവരുടെ നേതൃത്വത്തിലാണ് പ്രതികളെ പിടികൂടിയത്.