കുടിശ്ശിക ഫയലുകൾ തീർപ്പാക്കാൻ സോണൽ ഓഫിസുകളിൽ അദാലത്​

തിരുവനന്തപുരം: നഗരസഭയുടെ നേതൃത്വത്തിൽ സോണൽ ഓഫിസുകളിലെ കുടിശ്ശിക ഫയലുകൾ തീർപ്പാക്കുന്നതിനായി സംഘടിപ്പിച്ച അദാലത്തിൽ 50 ഫയലുകൾ തീർപ്പാക്കി. കഴക്കൂട്ടം, ആറ്റിപ്ര, ഫോർട്ട്, തിരുവല്ലം, വട്ടിയൂർക്കാവ്, കുടപ്പനക്കുന്ന് സോണൽ ഓഫിസുകളിലായി 68 അപേക്ഷകളാണ് ലഭിച്ചത്. സോണൽ ഓഫിസിൽ ബാക്കിയുള്ള ഫയലുകൾ സമയബന്ധിതമായി തീർപ്പാക്കുന്നതിന് ഉദ്യോഗസ്ഥർക്ക് നിർദേശം നൽകി. എല്ലാ സോണൽ ഓഫിസിലും ഉദ്യോഗസ്ഥയോഗം ചേർന്ന് ഓഫിസ് പ്രവർത്തനം കാര്യക്ഷമമാക്കുന്നതിനുള്ള നടപടികൾ സ്വീകരിക്കുന്നതിനും നിർദേശിച്ചു. കഴക്കൂട്ടം സോണൽ ഓഫിസിൽ മേയർ അഡ്വ. വി.കെ. പ്രശാന്ത്, റവന്യൂ ഓഫിസർ എസ്. ലക്ഷ്മി, ആറ്റിപ്ര സോണൽ ഓഫിസിൽ വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ സി. സുദർശനൻ, നഗരസഭ സെക്രട്ടറി എ.എസ്. ദീപ, ഫോർട്ട് സോണൽ ഓഫിസിൽ ഹെൽത്ത് സ്റ്റാൻഡിങ് കമ്മിറ്റി ചെയർമാൻ കെ. ശ്രീകുമാർ, ഡെപ്യൂട്ടി സെക്രട്ടറി ഡി. ശ്രീകുമാരി, കുടപ്പനക്കുന്ന് സോണൽ ഓഫിസിൽ മരാമത്തുകാര്യ സ്റ്റാൻഡിങ് കമ്മിറ്റി ചെയർപേഴ്സൺ എസ്. പുഷ്പലത, പി.എ ടു സെക്രട്ടറി എസ്. ജയകുമാർ, വട്ടിയൂർക്കാവ് സോണൽ ഓഫിസിൽ നികുതി അപ്പീൽകാര്യ സ്റ്റാൻഡിങ് കമ്മിറ്റി ചെയർപേഴ്സൺ കെ. രാജഗോപാൽ, തിരുവല്ലം സോണൽ ഓഫിസിൽ ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്സൺ എസ്.എസ്. സിന്ധു, സൂപ്രണ്ടിങ് എൻജിനീയർ എം.കെ. രാജൻ എന്നിവർ അദാലത്തിന് നേതൃത്വം നൽകി.