കള്ളവോട്ട് കേരളത്തിന് അപമാനം -സുധീരൻ

തിരുവനന്തപുരം: രാഷ്ട്രീയ പ്രബുദ്ധമെന്ന് അഭിമാനിക്കുന്ന കേരളത്തിന് അപമാനകരമാണ് വ്യാപക തെരഞ്ഞെടുപ്പ് ക്രമക് കേടും കള്ളവോട്ടുമെന്ന് മുൻ കെ.പി.സി.സി പ്രസിഡൻറ് വി.എം. സുധീരൻ. സി.പി.എം അധികാരത്തിലുണ്ടെങ്കിൽ ഭരണസംവിധാനം ഇതിന് ഉപയോഗപ്പെടുത്തുന്ന അവസ്ഥയാണ്. അധികാരത്തിന് പുറത്താണെങ്കിൽ തങ്ങളുടെ സ്വാധീന മേഖലകളിൽ മുഷ്ക്കും ഭീഷണിയും പ്രയോഗിച്ച് തെരഞ്ഞെടുപ്പ് ഉദ്യോഗസ്ഥരെയും വോട്ടർമാരെയും വരുതിയിലാക്കാൻ ശ്രമിക്കും. ആക്ഷേപങ്ങൾ സമഗ്രമായി അന്വേഷിച്ച് തുടർ നിയമനടപടിയെടുക്കണം. പൊലീസിലും കള്ളവോട്ട് നടന്നതായ ആക്ഷേപം സ്ഥിതിഗതി ഗൗരവമുള്ളതായി മാറ്റിയിരിക്കുന്നു. ഇക്കാര്യത്തിലും തെരഞ്ഞെടുപ്പ് കമീഷൻ ശക്തമായ നടപടി സ്വീകരിക്കണമെന്ന് അദ്ദേഹം ആവശ്യപ്പെട്ടു.