108 ആംബുലൻസി​െൻറ വൈദ്യസഹായത്തോടെ യുവതിക്ക് വീട്ടിൽ സുഖപ്രസവം

തിരുവനന്തപുരം: 108 ആംബുലൻസി​െൻറ വൈദ്യസഹായത്തോടെ യുവതിക്ക് വീട്ടിൽ സുഖപ്രസവം. മണക്കാട് കുത്തുകല്ലിൻമൂട് വിശ്വനന്ദ ലെയ്നിൽ മുഹമ്മദ് ഷബീറി​െൻറ ഭാര്യ ബുഷ്‌റ (25) ആണ് വീട്ടിൽ പെൺകുഞ്ഞിന്‌ ജന്മം നൽകിയത്. ചൊവ്വാഴ്ച വൈകിട്ട് അഞ്ചേമുക്കാലോടെ ബുഷ്‌റക്ക് പ്രസവവേദന അനുഭവപ്പെട്ടതിനെതുടർന്ന് ബന്ധുക്കൾ 108 ആംബുലൻസി​െൻറ സഹായം തേടുകയായിരുന്നു. കൺട്രോൾ റൂമിൽനിന്ന് വിവരം അറിയിച്ചതനുസരിച്ച് ഉടൻതന്നെ ഫോർട്ട് താലൂക്ക് ആശുപത്രി കേന്ദ്രീകരിച്ച് സർവിസ് നടത്തുന്ന 108 ആംബുലൻസിലെ പൈലറ്റ് ചഞ്ചുകുമാർ, എമർജൻസി മെഡിക്കൽ ടെക്നീഷ്യൻ വൈശാഖ് എന്നിവർ വീട്ടിലെത്തി. നഴ്‌സ് വൈശാഖ് നടത്തിയ പരിശോധനയിൽ ബുഷ്‌റയെ ആംബുലൻസിലേക്ക് മാറ്റാൻ കഴിയാത്ത അവസ്ഥയാണെന്ന് കണ്ടെത്തി. ബുഷ്‌റയുടെ അവസ്ഥ മോശമായതിനാൽ വൈശാഖ് വീട്ടിൽ വെച്ചുതന്നെ പ്രസവം എടുക്കാൻ വേണ്ട സജ്ജീകരണങ്ങൾ ചെയ്തു. ആറോടെ പെൺകുഞ്ഞിന്‌ ജന്മം നൽകി. പ്രഥമ ശുശ്രൂഷ നൽകിയശേഷം ഉടൻതന്നെ അമ്മയെയും കുഞ്ഞിനെയും ആശുപത്രിയിലേക്ക് മാറ്റി. ഇരുവരും സുഖമായി ഇരിക്കുന്നതായി ആശുപത്രി അധികൃതർ വ്യക്തമാക്കി. ഇത് മുഹമ്മദ് ഷബീർ-ബുഷ്‌റ ദമ്പതികളുടെ രണ്ടാമത്തെ കുഞ്ഞാണ്.