ബി.ജെ.പി സമരങ്ങൾ അപഹാസ്യം -കാനം

തിരുവനന്തപുരം: ബി.ജെ.പി നടത്തുന്ന സമരങ്ങൾ അപഹാസ്യമാണെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രൻ. എ.ഐ.വൈ.എഫ് വാർഷികാഘോഷങ്ങളുടെ സംസ്ഥാനതല ഉദ്ഘാടനം നിർവഹിക്കുകയായിരുന്നു അദ്ദേഹം. ആത്മഹത്യയെപ്പോലും രാഷ്ട്രീയ ലാഭത്തിനായി ഉപയോഗിച്ച് ജനങ്ങളെ ബുദ്ധിമുട്ടിക്കുകയാണവർ. അനാവശ്യസമരങ്ങൾ നടക്കുമ്പോൾ ജനകീയസമരങ്ങളെയും അതേ കാഴ്ചപ്പാടോടെ പൊതുസമൂഹം നോക്കികാണും. ശബരിമല യുവതി പ്രവേശന വിഷയത്തിൽ കോൺഗ്രസി​െൻറ നിലപാട് വിചിത്രമാണ്. യഥാർഥ ഇടതുപക്ഷ സമീപനമാണ് എൽ.ഡി.എഫ് ഈ വിഷയത്തിൽ സ്വീകരിച്ചതെന്നും കാനം പറഞ്ഞു. എ.ഐ.വൈ.എഫ് സംസ്ഥാന പ്രസിഡൻറ് അഡ്വ. ആർ. സജിലാൽ അധ്യക്ഷതവഹിച്ചു. രാജാജി മാത്യു തോമസ്, ജോസ് ബേബി, കെ. രാജൻ, ദേശീയ ജനറൽ സെക്രട്ടറി ആർ. തിരുമലൈ, സംസ്ഥാന സെക്രട്ടറി മഹേഷ് കക്കത്ത്, എ.ഐ.എസ്.എഫ് സംസ്ഥാന സെക്രട്ടറി ശുഭേഷ് സുധാകർ, അരുൺ കെ.എസ്, എ.എസ്. ആനന്ദകുമാർ തുടങ്ങിയവർ സംബന്ധിച്ചു.