വിമാനത്താവളത്തിൽ 48 ലക്ഷത്തി​െൻറ വിദേശ കറൻസി പിടികൂടി

* തമിഴ്നാട് സ്വദേശി കസ്റ്റഡിയിൽ ശംഖുംമുഖം: വിദേശത്തേക്ക് കടത്താൻ ശ്രമിച്ച 48 ലക്ഷം രൂപ വിലവരുന്ന വിദേശ കറൻസി വിമാനത്താവളത്തിൽ എയർകസ്റ്റംസ് വിഭാഗം പിടികൂടി. തമിഴ്നാട് സ്വദേശി സിക്കന്ദർ മുഹമ്മദ് അലി(31)യിൽ നിന്നാണ് ഇവ പിടികൂടിയത്. ശനിയാഴ്ച പുലർച്ചെ തിരുവനന്തപുരത്തുനിന്ന് ദുബൈയിലേക്ക് പോകുന്ന 'ഫ്ലൈ ദുബൈ' വിമാനത്തിൽ പോകാനെത്തിയ ഇയാളുടെ ലഗേജിനുള്ളിൽ വിദേശ കറൻസികൾ ഒളിപ്പിച്ചിരിക്കുന്നത് സി.ഐ.എസ്.എഫ് അധികൃതർ സ്ക്കാനിങ് പരിശോധനയിൽ കണ്ടെത്തി. തുടർന്ന് വിവരം എയർകസ്റ്റംസിനെ അറിയിച്ചു. എയർകസ്റ്റംസ് വിശദമായി പരിശോധിച്ചപ്പോഴാണ് യു.എസ്, സൗദി, യു.എ.ഇ രാജ‍്യങ്ങളുടെ കറൻസികൾ കണ്ടെത്തിയത്. എയർകസ്റ്റംസ് ഇൻറലിജൻസ് ഡെപ‍്യൂട്ടി കമീഷണർ കൃഷ്ണേന്ദു രാജ മിൻറുവിൻറ നേതൃത്വത്തിൽ സൂപ്രണ്ടുമാരായ രാധാകൃഷ്ണൻ, റെജി, ഇൻസ്പെക്ടർമാരായ രജനീഷ്, വീരേഷ് എന്നിവരടങ്ങുന്ന സംഘമാണ് പരിശോധന നടത്തിയത്.