വീരളം റോഡിൽ വീഴാതെ സൂക്ഷിക്കുക

ആറ്റിങ്ങല്‍: നഗരത്തിലെ പ്രധാനറോഡായ ടൗണ്‍ യു.പി.എസ്-വീരളം റോഡ് കുഴികള്‍ നിറഞ്ഞ് അപകടക്കെണിയായി. തിരക്കേറിയ റോഡില്‍ നിരവധി അപകടങ്ങളാണ് ദിവസവും നടക്കുന്നത്. ആറ്റിങ്ങലില്‍നിന്ന് കൊല്ലത്തേക്ക് പോകേണ്ട ചെറുതും വലുതുമായ മുഴുവന്‍ വാഹനങ്ങളും കടന്നുപോകുന്ന റോഡാണിത്. രാവിലെ എട്ടു മുതല്‍ രാത്രി എട്ടു വരെ പാതയില്‍ വാഹനത്തിരക്കാണ്. ഇടുങ്ങിയ റോഡി​െൻറ വശത്തെ ഓടയുടെ മൂടികള്‍ പലയിടത്തും പൊട്ടിപ്പൊളിഞ്ഞു. ഇവ മാറ്റി സ്ഥാപിക്കാന്‍ അധികൃതര്‍ തയാറായിട്ടില്ല. റോഡില്‍ പലയിടത്തും വലിയ കുഴികളാണുള്ളത്. ഇറക്കത്തിലായതിനാല്‍ അടുത്തെത്തിയശേഷമേ കണ്ണില്‍പ്പെടൂ. കുഴിയില്‍ വീണ് നിയന്ത്രണംവിട്ടുപോകുന്ന ഇരുചക്രവാഹന യാത്രികർ റോഡില്‍ മറിഞ്ഞുവീഴുന്നത് പതിവാണ്. പാതയിൽ രാത്രി തെരുവ് വിളക്കുകളൊന്നും കത്തുന്നില്ല. റോഡ് അടിയന്തരമായി പുനരുദ്ധരിക്കണമെന്നും തെരുവു വിളക്കുകള്‍ നവീകരിക്കണമെന്നുമാണ് യാത്രക്കാരുടെയും നാട്ടുകാരുടെയും ആവശ്യം.