സരിതയെ കാണാനില്ല; വിചിത്ര റിപ്പോർട്ടുമായി പൊലീസ്​

തിരുവനന്തപുരം: കാറ്റാടി‌യന്ത്രത്തി​െൻറ വിതരണാവകാശം നൽകാമെന്ന് വാഗ്ദാനം നൽകി ലക്ഷങ്ങൾ തട്ടിയെന്ന കേസിൽ പ്രതിയായ സരിത എസ്. നായരെ കാണാനില്ലെന്ന് പൊലീസ്. വലിയതുറ പൊലീസാണ് റിപ്പോർട്ട് കോടതിയിൽ സമർപ്പിച്ചത്. കേസിൽ സരിതക്കെതിരെ നേരത്തേ കോടതി അറസ്റ്റ് വാറൻറ് പുറപ്പെടുവിച്ചിരുന്നു. മുമ്പ് പലതവണ കേസ് പരിഗണിച്ചപ്പോഴും സരിത ഹാജരായിരുന്നില്ല. ഇതിനെത്തുടർന്ന് സരിത എവിടെയെന്ന് അന്വേഷിക്കാൻ കോടതി വലിയതുറ പൊലീസിന് നിർദേശം നൽകുകയായിരുന്നു. ഇതിനെത്തുടർന്നാണ് സരിതയെ കണ്ടെത്താനായില്ലെന്ന വിചിത്ര റിപ്പോർട്ട് പൊലീസ് അഡീഷനൽ ചീഫ് ജുഡീഷ്യൽ മജിസ്ട്രേറ്റ് കോടതിയിൽ സമർപ്പിച്ചത്. കാട്ടാക്കട സ്വദേശി അശോക് കുമാറി​െൻറ ലെംസ് പവർ ആൻഡ് കണക്ട് എന്ന സ്ഥാപനത്തിന് കാറ്റാടി യന്ത്രങ്ങളുടെ തിരുവനന്തപുരം ജില്ലയിലെ മൊത്തം വിതരണാവകാശം വാഗ്ദാനം ചെയ്ത് നാലര ലക്ഷംരൂപ തട്ടിെച്ചന്നാണ് കേസ്. സരിത എസ്. നായർ, ബിജു രാധാകൃഷ്ണൻ, ഇന്ദിരാദേവി, ഷൈജു സുരേന്ദ്രൻ എന്നിവരാണ് പ്രതികൾ. പ്രതികളുടെ കമ്പനിയുടെ ബാങ്ക് അക്കൗണ്ടിൽ രജിസ്ട്രേഷൻ തുകയായി തുക പരാതിക്കാരൻ നിക്ഷേപിച്ചു. പിന്നീട് അന്വേഷിച്ചപ്പോൾ ഇത്തരത്തിൽ കമ്പനി ഇല്ലെന്ന് മനസ്സിലായതോടെ ഇയാൾ പൊലീസിൽ പരാതി നൽകി. 2009ലാണ് സംഭവം. 2010ലാണ് കുറ്റപത്രം സമർപ്പിച്ചത്.