അംഗൻവാടി വർക്കർ രണ്ട് ആനുകൂല്യങ്ങൾ വാങ്ങിയതിനെപ്പറ്റി അന്വേഷിക്കണമെന്ന്​

ആര്യനാട്: അംഗൻവാടി വർക്കറായ പഞ്ചായത്തംഗം ഒരേ സമയം രണ്ട് ആനുകൂല്യങ്ങൾ വാങ്ങിയതിനെപ്പറ്റി അന്വേഷിക്കണമെന്നും വാർഡ് അംഗം സ്ഥാനം രാജിവെക്കണമെന്നും ബി.ജെ.പി അരുവിക്കര നിയോജക മണ്ഡലം പ്രസിഡൻറ് മുളയറ രതീഷ് വാർത്തസമ്മേളനത്തിൽ ആവശ്യപ്പെട്ടു. പഞ്ചായത്തിൽനിന്ന് വാർഡ് അംഗം എന്നനിലയിലും സ്ഥിരംസമിതി ചെയർപേഴ്സൺ എന്നനിലയിലും ഓണറേറിയം, സിറ്റിങ് ഫീസ്, മറ്റ് അലവൻസുകൾ എന്നിവ ഒരേ സമയം കൈപ്പറ്റിയാതി വിവരാവകാശ രേഖകളിൽനിന്ന് വ്യക്തമാണ്. ഒരേ ദിവസം അംഗൻവാടിയിൽ ഹാജരായതായി ഒപ്പിടുകയും അന്നേദിവസംതന്നെ പഞ്ചായത്തുകമ്മിറ്റിയിലും സ്റ്റാൻഡിങ് കമ്മിറ്റിയിലും പങ്കെടുത്ത് ഹാജർ രേഖപ്പെടുത്തിയിട്ടുണ്ടെന്നും പറഞ്ഞു. വാർത്തസമ്മേളനത്തിൽ മണ്ഡലം ജനറൽ സെക്രട്ടറി പൂവച്ചൽ ജ്യോതികുമാർ, യുവമോർച്ച മണ്ഡലം പ്രസിഡൻറ് രഞ്ജിത്ത് കടമ്പനാട്, പഞ്ചായത്ത് കമ്മിറ്റി പ്രസിഡൻറ് ഇറവൂർ അജി, സെക്രട്ടറി എം.എസ്. സജി എന്നിവർ പങ്കെടുത്തു.