ബൈക്കിടിച്ച്​ കാൽനടയാത്രക്കാരൻ മരിച്ചു

തിരുവനന്തപുരം: പാപ്പനംകോടിന് സമീപം റോഡ് മുറിച്ചുകടക്കുന്നതിനിടെ മൂന്നുപേരുമായി വന്ന ബൈക്കിടിച്ച് കാൽനട യാത്രക്കാരൻ മരിച്ചു. പാപ്പനംകോട് എസ്‌റ്റേറ്റ് കോലിയക്കോട് പുത്തളത്ത് വീട്ടിൽ തങ്കപ്പൻ നായർ (50) ആണ് മരിച്ചത്. ബുധനാഴ്ച രാത്രി പാപ്പനംകോട് തുലവിളക്ക് സമീപം കല്യാണമണ്ഡപത്തിന് മുന്നിലെ തുറന്ന മീഡിയന് സമീപമാണ് അപകടം. നേമം ഭാഗത്തേക്ക് അമിത വേഗത്തിൽ വന്ന ബൈക്കാണ് ഇടിച്ചത്. ഇടിയുടെ ആഘാതത്തിൽ റോഡിൽ തെറിച്ചുവീണ തങ്കപ്പൻ നായർക്ക് തലക്കാണ് ഗുരുതരമായി പരിക്കേറ്റത്. ബൈക്കിലുണ്ടായിരുന്നവർക്കും റോഡിൽ തെറിച്ചുവീണ് പരിക്കേറ്റു. മാമ്പഴക്കര സ്വദേശി വിനീത് (22), ഒറ്റശേഖരമംഗലം സ്വദേശി ജിഷ്ണു (19) എന്നിവർക്കാണ് പരിക്ക്. ഇവരെ പൊലീസ് വാഹനത്തിൽ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഹെഡ്ലോഡ് യൂനിയൻ തൊഴിലാളിയാണ് മരിച്ച തങ്കപ്പൻ നായർ. ഭാര്യ: അനിത. മക്കൾ: അരുൺ, അഞ്ജു. മൃതദേഹം മെഡിക്കൽ കോളജ് ആശുപത്രി മോർച്ചറിയിൽ.