ദുരന്തബാധിത മേഖലകളിൽ സർക്കാർ ധനസഹായം ഉടൻ എത്തിക്കണം - വി.എസ്​. ശിവകുമാർ

തിരുവനന്തപുരം: സർക്കാർ ധനസഹായം ഇതുവരെ ലഭിക്കാത്ത പ്രളയബാധിതമേഖലകളിൽ സഹായം ഉടൻ എത്തിക്കണമെന്ന് വി.എസ്. ശിവകുമാർ എം.എൽ.എ ആവശ്യപ്പെട്ടു. ചെങ്ങന്നൂർ പാണ്ടനാട് പഞ്ചായത്തിലെ പൂപ്പരത്തി കോളനിയിൽ തിരുവനന്തപുരം നിയോജക മണ്ഡലത്തിലെ കോൺഗ്രസ് പ്രവർത്തകർക്കൊപ്പം ദുരിതാശ്വാസപ്രവർത്തനങ്ങളിൽ പങ്കെടുത്തശേഷമാണ് എം.എൽ.എ ഇക്കാര്യം ആവശ്യപ്പെട്ടത്. കോളനിയിൽ സർക്കാർ പ്രഖ്യാപിച്ച പതിനായിരം രൂപ ധനസഹായം ഇതുവരെ ലഭ്യമായിട്ടില്ല. വീട്ടുപകരണങ്ങളും വിലപ്പെട്ട രേഖകളും നഷ്ടപ്പെട്ടു. ശുദ്ധജലം ലഭ്യമല്ലാത്ത അവസ്ഥയാണ് ഇപ്പോഴും. വൈദ്യുതി കണക്ഷൻ ഇനിയും ലഭ്യമായിട്ടില്ല. എ.ഡി.എം ഉൾപ്പെടെയുള്ള റവന്യൂ ഉദ്യോഗസ്ഥരെ കോളനിവാസികളുടെ ദയനീയത അറിയിച്ചിരുന്നു. നാളുകൾ ഇത്രയും കഴിഞ്ഞിട്ടും പരിഹാരമുണ്ടായിട്ടില്ല. സർക്കാർ സംവിധാനങ്ങൾ ഇക്കാര്യത്തിൽ ഉണർന്നുപ്രവർത്തിക്കണമെന്നും ശിവകുമാർ ആവശ്യപ്പെട്ടു.