ഗിന്നസ് ലക്ഷ്യമാക്കി ഗണിതശാസ്ത്ര അധ്യാപകൻ

പടം വർക്കല: ഗണിതശാസ്ത്ര അധ്യാപനത്തിലൂടെ ഗിന്നസ് റെക്കോഡ് ലക്ഷ്യമിട്ട് പാരലൽ കോളജ് അധ്യാപകൻ. വർക്കല പുന്നമൂട് തേരകുളം മഹാലക്ഷ്മിയിൽ സുരേഷ് ബാബുവാണ് ഗിന്നസ് റെക്കോഡ് ശ്രമം നടത്തുന്നത്. ഗണിത ശാസ്ത്രത്തിലെ അടിസ്ഥാനപാഠങ്ങളായ അമ്പതിൽപരം അധ്യായങ്ങളാണ് ഏവർക്കും പഠിച്ചെടുക്കാനാവും വിധത്തിൽ 12 മണിക്കൂർ കൊണ്ട് ഇദ്ദേഹം പഠിപ്പിച്ചുതീർക്കുന്നത്. വർക്കല ഗവ.എച്ച്.എസ്, തിരുവനന്തപുരം എം.ജി കോളജ്, എഴുകോൺ ഗവ. പോളിടെക്നിക് എന്നിവിടങ്ങളിലായി വിദ്യാഭ്യാസം പൂർത്തിയാക്കിയ സുരേഷ് ബാബു സമാന്തര വിദ്യാഭ്യാസ രംഗത്ത് തിരക്കുള്ള അധ്യാപകനാണ്. 'ലാർജസ്റ്റ് മാത്സ് ലെസൺ' എന്ന പേരിലാണ് ഗിന്നസ് റെക്കോഡ് സ്ഥാപിക്കാനുള്ള ക്ലാസ് 14ന് രാവിലെ ഏഴു മുതൽ വൈകുന്നേരം ഏഴു വരെ വർക്കല ടൗൺ ഹാളിൽ സംഘടിപ്പിക്കുന്നത്. ഭിന്നസംഖ്യ, ദശാംശ സംഖ്യ, അടിസ്ഥാന ചിഹ്നങ്ങൾ, ശതമാനം, ശരാശരി, വർഗവും വർഗമൂലവും, ഘനവും ഘനമൂലവും, വിസ്തീർണം, വ്യാപ്തി, ജാമിതി, ത്രികോണങ്ങൾ തുടങ്ങി അമ്പതിൽപരം അധ്യാപനങ്ങളടങ്ങിയ അടിസ്ഥാനപഠങ്ങളാണ് തുടർച്ചയായ 12 മണിക്കൂർ ക്ലാസിലൂടെ പഠിപ്പിക്കുന്നത്.