പ്രളയം: 'കൂട്ടുകാർക്ക് ഞങ്ങളുണ്ട്' സ്കൂൾ കൂട്ടികൾ പഠനോപകരണങ്ങൾ ശേഖരിച്ചു

കിളിമാനൂർ: 'പ്രളയത്തെ തുടർന്ന് സർവതും നഷ്ടപ്പെട്ട കൂട്ടുകാർക്ക് ഞങ്ങളുണ്ട്' എന്ന് പറഞ്ഞ് വീട്ടിലേക്ക് പോയ കുട്ടികൾ, കഴിഞ്ഞ ദിവസങ്ങളിൽ സ്കൂളിലെത്തിച്ചത് പഠനോപകരണങ്ങളുടെ ശേഖരംതന്നെ. സ്കൂളിലെ ഓണാഘോഷം മാറ്റിയതായും ദുരിതബാധിതരായ കുട്ടികളെ സംരക്ഷിക്കണമെന്നും അധ്യാപകർ പറഞ്ഞതോടെ, ഓണത്തിന് സമ്മാനമായി കിട്ടിയ തുകകൾ അവർ സ്വരുക്കൂട്ടുകയായിരുന്നു. 170ഒാളം കുരുന്നുകൾ പഠിക്കുന്ന കിളിമാനൂർ ഗവ. എൽ.പി സ്കൂളിൽ കഴിഞ്ഞദിവസം സ്വരുക്കൂട്ടിയത് 23,000 ത്തോളം രൂപയുടെ പഠനോപകരണങ്ങളാണ്. വലുതും ചെറുതുമായ 700ൽപരം നോട്ടുബുക്കുകൾ, സ്കൂൾ ബാഗുകൾ, ടിഫിൻ ബോക്സ്, പേന, പെൻസിൽ അടങ്ങുന്നതാണ് ഇവർ എത്തിച്ചത്. ശനിയാഴ്ച സ്കൂൾ അങ്കണത്തിൽ നടന്ന ചടങ്ങിൽ കിളിമാനൂർ ബ്ലോക്ക് പഞ്ചായത്ത് പ്രസിഡൻറ് ശ്രീജാ ഷൈജു ദേവ് പഠനോപകരണങ്ങൾ ഏറ്റുവാങ്ങി ബി.ആർ.സി ബി.പി.ഒ സുരേഷ് ബാബുവിന് കൈമാറി. എസ്.എം.സി ചെയർമാൻ രതീഷ് പോങ്ങനാട് അധ്യക്ഷതവഹിച്ചു. വാർഡ് അംഗം ബീനാ വേണുഗോപാൽ, സ്കൂൾ വികസന സമിതി ചെയർമാൻ സുകുമാരപിള്ള, പ്രഥമാധ്യാപിക വസന്തകുമാരിയമ്മ, മുൻ പ്രഥമാധ്യാപകൻ അഹമ്മദ് കണ്ണ്, അധ്യാപക പ്രതിനിധി അഭിലാഷ് എന്നിവർ സംസാരിച്ചു.