യുവാവിനെ ഒഴുക്കിൽപെട്ട് കാണാതായി

നെടുമങ്ങാട്: കൂട്ടുകാരോടൊപ്പം കുളിക്കാനിറങ്ങിയ യുവാവിനെ ഒഴുക്കിൽപെട്ട് കാണാതായി. കരകുളം മുല്ലശേരി മാങ്കാല സനുഭവനിൽ രാധാകൃഷ്ണൻ-സനൂജ ദമ്പതികളുടെ മകൻ മനുവിനെ(26)യാണ് ഞായറാഴ്ച വൈകീട്ട് കരമനയാറിൽ കാണാതായത്. ടിപ്പർ ഡ്രൈവറായ മനു വൈകീട്ട് നാലരയോടെ നാല് സുഹൃത്തുക്കളുമായി വെമ്പന്നൂർ വികാസ് നഗർ കടവിൽ കുളിക്കാനിറങ്ങുകയായിരുന്നു. കുളിക്കുന്നതിനിടെ പെട്ടെന്ന് കാണാതാവുകയായിരുന്നു. കൂടെയുണ്ടായിരുന്നവർ മനുവിനെ കണ്ടെത്താൻ നടത്തിയ ശ്രമം വിഫലമായതിനെ തുടർന്ന് പൊലീസിൽ അറിയിക്കുകയായിരുന്നു. തുടർന്ന് പൊലീസും അഗ്നിരക്ഷാസേനയും സ്ഥലത്തെത്തി തെരച്ചിൽ നടത്തിയെങ്കിലും കണ്ടെത്താനായില്ല. ആറ്റിൽ നല്ല ഒഴുക്കുണ്ടായിരുന്നതിനാലും കാലാവസ്ഥ പ്രതികൂലമായതിനാലും തെരച്ചിൽ വൈകീട്ടോടെ നിർത്തിവെക്കുകയായിരുന്നു. സനു രാധാകൃഷ്‍ണൻ സഹോദരനാണ്.