വീട് കുത്തിത്തുറന്ന് പതിനാലര പവൻ സ്വർണവും പണവും കവർന്നു

വെഞ്ഞാറമൂട്: വീട്ടുകാർ ക്ഷേത്രത്തിൽ പോയ തക്കത്തിന് വീട് കുത്തിത്തുറന്ന് പതിനാലര പവൻ സ്വർണവും 6000 രൂപയും കവർന്നു. കോലിയക്കോട് സൊസൈറ്റി ജങ്ഷനിൽ പ്ലാപ്പള്ളി വീട്ടിൽ ബിജുവി​െൻറ വീട്ടിലാണ് മോഷണം നടന്നത്. കഴിഞ്ഞ ദിവസം രാത്രി ഏഴു മണിയോടെ ബിജുവും ഭാര്യയും തൊട്ടടുത്തുള്ള ക്ഷേത്രത്തിൽ പോയിരുന്നു. അര മണിക്കൂർ കഴിഞ്ഞ് മടങ്ങിവന്നപ്പോൾ വീടി​െൻറ മുൻവശത്തെ വാതിൽ തുറക്കാൻ കഴിഞ്ഞില്ല. തുടർന്ന്, പിൻവശത്തെ വാതിൽ തുറന്നുകിടക്കുന്ന നിലയിൽ കണ്ടെത്തി. മുറിയിലെ അലമാരയിലെ സാധനങ്ങളെല്ലാം വാരിവലിച്ചിട്ട നിലയിലായിരുന്നു. പരിശോധനയിൽ സ്വർണാഭരണങ്ങളും 6000 രൂപയും കവർന്നതായി കണ്ടെത്തി. തുടർന്ന് പരാതിയുടെ അടിസ്ഥാനത്തിൽ വെഞ്ഞാറമൂട് പൊലീസും വിരലടയാള വിദഗ്ധരും സ്ഥലത്തെത്തി പരിശോധന നടത്തി.