പരീക്ഷയിലും മൂവർസംഘം ​േനടി; മിന്നുന്നവിജയം

കൊല്ലം: ഒരേസമയം ജനിച്ച് കളിച്ചും പഠിച്ചും വളർന്ന മൂവർസംഘത്തിന് എസ്.എസ്.എൽ.സി പരീക്ഷയിലും ഒരേവിജയം. കരിക്കോട് ടി.കെ.എം ഹയർ സെക്കൻഡറി സ്കൂളിലെ വിദ്യാർഥികളായ ആർച്ച, ആർദ്ര, ആർഷ എന്നിവരാണ് എല്ലാവിഷയങ്ങൾക്കും എ പ്ലസ് നേടിയത്. തിരുവനന്തപുരം പി.എസ്.സി ഒാഫിസിലെ ജീവനക്കാരനായ കരിക്കോട് പേരൂർ അവിട്ടത്തിൽ ഷിജി സനാദന​െൻറയും റീനിയുടെയും മക്കളാണ് മൂവരും. എൽ.കെ.ജി മുതൽ ഒരേക്ലാസിലായിരുന്നു പഠനം. എട്ടാം ക്ലാസ് മുതലാണ് ടി.കെ.എം ഹയർ സെക്കൻഡറി സ്കൂളിലെത്തുന്നത്. പ്ലസ് ടുവിന് സയൻസ് ഗ്രൂപ് എടുക്കാനാണ് മൂവരുടെയും തീരുമാനം.