കൊല്ലങ്കോട് തൂക്കത്തിന് ഇന്ന് കൊടിയേറും

നാഗർകോവിൽ: കൊല്ലങ്കോട് വെങ്കഞ്ഞി വട്ടവിള ശ്രീഭദ്രകാളി ക്ഷേത്രത്തിലെ മീനഭരണി തൂക്കമഹോത്സവത്തി​െൻറ ഭാഗമായ കൊടിയേറ്റ് തിങ്കളാഴ്ച സന്ധ്യക്ക് നടക്കും. ദേവസ്വം തന്ത്രി കൊട്ടാരക്കര നീലമന ഈശ്വരൻപോറ്റിയുടെ കാർമികത്വത്തിലാണ് ചടങ്ങുകൾ നടക്കുക. 10 ദിവസം നീളുന്ന ഉത്സവം 21ന് തൂക്കനേർച്ച കഴിഞ്ഞ് വില്ലിൻ മൂട്ടിൻ ഗുരുസി തർപ്പണത്തോടെ സമാപിക്കും. വെങ്കഞ്ഞിക്ഷേത്രത്തിലേക്ക് കൊടിമരഘോഷയാത്ര തിങ്കളാഴ്ച രാവിലെ ഏഴിന്. രാത്രി ഒമ്പതിന് ഉദ്ഘാടന സമ്മേളനം തമിഴ്നാട് ഗവർണർ ബൻവാരിലാൽ പുരോഹിത് നിർവഹിക്കും. തൂക്കനേർച്ച നറുക്കെടുപ്പ് 15ന് നടക്കും. 17ന് വൈകീട്ട് ഏഴിന് സാംസ്കാരിക സമ്മേളനം. ഒമ്പതാം ഉത്സവദിനമായ 20ന് വൈകീട്ട് ആറിന് വണ്ടിയോട്ടം. 21ന് രാവിലെ ആറിന് തൂക്കനേർച്ചയുടെ ഭാഗമായി തൂക്കക്കാരുടെ ഒരുങ്ങിവരവ് ഘോഷയാത്ര. ഉത്സവനാളുകളിൽ പ്രത്യേകപൂജകളും കലാപരിപാടികളും അന്നദാനവും ഉണ്ടാകും. ഉത്സവത്തി​െൻറ ഒരുക്കം പൂർത്തിയായതായി ക്ഷേത്രം പ്രസിഡൻറ് വി. സദാശിവൻനായർ അറിയിച്ചു.