രക്തദാനം: തെറ്റിദ്ധാരണ മാറ്റണം- മുഖ്യമന്ത്രി

തിരുവനന്തപുരം: രക്തദാനത്തെക്കുറിച്ച് പേടിയും തെറ്റിദ്ധാരണയും ആവശ്യമില്ലെന്ന് മുഖ്യമന്ത്രി പിണറായി വിജയന്‍. സംസ്ഥാന എയ്ഡ്‌സ് നിയന്ത്രണ സൊസൈറ്റിയുടെ ആഭിമുഖ്യത്തില്‍ സംഘടിപ്പിച്ച ലോക രക്തദാതാ ദിനാചരണത്തി​െൻറയും ബ്ലഡ് മൊബൈല്‍ ബസി​െൻറയും ഉദ്ഘാടനം നിര്‍വഹിക്കുകയായിരുന്നു അദ്ദേഹം. രക്തസാമ്പിൾ വേര്‍തിരിക്കുന്ന സെപ്പറേഷന്‍ യൂനിറ്റും രക്തബാങ്കും എല്ലാ ജില്ലാ ആശുപത്രികളിലും പ്രധാന ആശുപത്രികളിലും സ്ഥാപിക്കാൻ ശ്രമം തുടങ്ങിയതായി അധ്യക്ഷതവഹിച്ച മന്ത്രി കെ.കെ. ശൈലജ പറഞ്ഞു. ദിനാചരണത്തോടനുബന്ധിച്ച് രക്തദാനക്യാമ്പ്, ബോധവത്കരണം തുടങ്ങിയവ സംഘടിപ്പിച്ചു. സംസ്ഥാനതല ഉദ്ഘാടന ചടങ്ങ് നടന്ന ഗവ. ലോ കോളജില്‍ സന്നദ്ധ രക്തദാന ക്യാമ്പും സെമിനാറും സ്‌പോട്ട് ക്വിസും നടന്നു.