വൃക്കകൾ തകരാറിലായ നദീമയുടെ ശസ്​ത്രക്രിയ ചെലവ് ലുലു ഗ്രൂപ് ഏറ്റെടുക്കും

പാലോട്: ഇരുവൃക്കയും തകരാറിലായ നദീമയുടെ ശസ്ത്രക്രിയക്കുള്ള ചെലവ് ലുലു ഗ്രൂപ് ഏറ്റെടുക്കും. പാലോട് എൻ.എൻ ഹൗസില്‍ താജുദ്ദീ​െൻറ മകൾ നദീമയുടെ (19) ചികിത്സക്ക് വഴിയില്ലാതെ കുടുംബം പ്രയാസപ്പെടുന്നത് മാധ്യമം വാർത്തയാക്കിയിരുന്നു. ഇത് ശ്രദ്ധിയിൽപെട്ട ലുലു ഇൻറർനാഷനൽ ചെയർമാൻ എം.എ. യൂസഫലി നിർദേശിച്ചതനുസരിച്ച് റീജനൽ മാനേജർ രാജീവ് സദാനന്ദൻ നദീമയുടെ വസതിയിലെത്തിയാണ് ചികിത്സ ഏറ്റെടുക്കാൻ സന്നദ്ധത അറിയിച്ചത്. നദീമ ഒരുവർഷമായി തിരുവനന്തപുരം മെഡിക്കൽ കോളജ് ആശുപത്രിയിൽ ചികിത്സയിലാണ്. പ്ലസ് ടുവിന് ഉന്നതവിജയം കരസ്ഥമാക്കിയ നദീമക്ക് രോഗാധിക്യംമൂലം പഠനം തുടരാനായില്ല. വൃക്ക പകുത്തുനൽകാൻ മാതാവ് തയാറായെങ്കിലും ഭാരിച്ച ചികിത്സാചെലവ് ചോദ്യചിഹ്നമായി. പിതാവ് നടത്തിയിരുന്ന കടയിൽനിന്നുള്ള വരുമാനമായിരുന്നു കുടുംബത്തി​െൻറ ആശ്രയം. എന്നാൽ, മകളുടെ രോഗവും നിരന്തരമുള്ള ചികിത്സാതിരക്കുകളും കാരണം താജുദ്ദീന് കച്ചവടം ഉപേക്ഷിക്കേണ്ടിവന്നു.