ഭാര്യയെ കൊലപ്പെടുത്താൻ ശ്രമം; ഗൃഹനാഥൻ അറസ്​റ്റിൽ

കല്ലറ: മാറിത്താമസിക്കുകയായിരുന്ന ഭാര്യയെ വീട്ടിൽ അതിക്രമിച്ചുകയറി കൊലപ്പെടുത്താൻ ശ്രമിച്ച കേസിൽ ഗൃഹനാഥൻ അറസ്റ്റിൽ. മിതൃമ്മല, ഇലങ്കം പെരുമ്പേലി പണയിൽ വീട്ടിൽ സുനിൽ കുമാർ (48) ആണ് അറസ്റ്റിലായത്. ആക്രമണത്തിൽ സാരമായി പരിക്കേറ്റ ഇയാളുടെ ഭാര്യ സന്ധ്യാറാണി (38) ആശുപത്രിയിൽ ചികിത്സയിലാണ്. കഴിഞ്ഞ ബുധനാഴ്ചയായിരുന്നു സംഭവം. സന്ധ്യാറാണിയുടെ വീട്ടിൽ അതിക്രമിച്ചുകയറിയ സുനിൽകുമാർ ടോർച്ച് കൊണ്ട് മുതുകിലും കൈയിലും അടിക്കുകയും മുറിയിലേക്ക് തള്ളിയശേഷം വെട്ടുകത്തി കൊണ്ട് വെട്ടുകയും ചെയ്തു. ഇതിനിടെ ഓടി രക്ഷപ്പെടാൻ ശ്രമിച്ച സന്ധ്യയെ ഇരുമ്പ് കമ്പികൊണ്ട് തലക്കടിച്ച് വീഴ്ത്തുകയും ചെയ്തു. സന്ധ്യാറാണിയുടെ തലയുടെ ഇടതുഭാഗത്തും നെറ്റിയിലും മൂക്കി​െൻറ പാലത്തിലും ഇടതുകാലിലും പരിക്കേറ്റിട്ടുണ്ട്. തുടർന്ന് വീട്ടിലുണ്ടായിരുന്ന ടി.വി, ഫ്രിഡ്ജ് എന്നിവയൊക്കെ നശിപ്പിക്കുകയും ചെയ്തു. അറസ്റ്റ് ചെയ്ത പ്രതിയെ കോടതിയിൽ ഹാജരാക്കി.