ഇ-പോസ്: പുതിയ സർവർ വാങ്ങുമെന്ന് ഭക്ഷ്യമന്ത്രി

തിരുവനന്തപുരം: ഇ-പോസ് മെഷീൻ വഴിയുള്ള റേഷൻ ഭക്ഷ്യധാന്യവിതരണം സുഗമമാക്കാൻ ഭക്ഷ്യപൊതുവിതരണ വകുപ്പ് സ്വന്തമായി സർവർ വാങ്ങുമെന്ന് ഭക്ഷ്യമന്ത്രി പി. തിലോത്തമൻ. നിയമസഭയിൽ എ.എൻ. ഷംസീർ എം.എൽ.എ ഉന്നയിച്ച സബ്മിഷന് മറുപടി പറയുകയായിരുന്നു അദ്ദേഹം. സർവർ വാങ്ങാനുള്ള നടപടികൾ അന്തിമഘട്ടത്തിലാണ്. വാടക സർവറിലാണ് നിലവിൽ ഇ-പോസ് മെഷീൻ വഴിയുള്ള റേഷൻ വിതരണം. റേഷൻ കാർഡ് ഉടമ കടയിലെത്തി മെഷീനിൽ വിരൽ പതിപ്പിക്കുമ്പോൾ കാർഡിന് അർഹമായ വിഹിതം സ്ക്രീനിൽ തെളിയുന്നതോടൊപ്പം ശബ്ദസന്ദേശവും നൽകുന്നുണ്ട്. ബില്ലിൽ ലഭിക്കുന്ന രേഖപ്പെടുത്തിയ വിഹിതം കൃത്യമായ അളവിൽ ലഭിച്ചിട്ടുണ്ടൊയെന്ന് കാർഡുടമ ഉറപ്പുവരുത്തണമെന്നും അദ്ദേഹം പറഞ്ഞു.