ട്രോളിങ്​ നിരോധനം ജൂണ്‍ ഒമ്പതു മുതല്‍: ഒരുക്കം പൂര്‍ത്തിയായി

കൊല്ലം: ജില്ലയില്‍ ട്രോളിങ് നിരോധനം സുഗമമായി നടപ്പാക്കുന്നതിനുള്ള ഒരുക്കം പൂര്‍ത്തിയായി. ശനിയാഴ്ച അര്‍ധരാത്രി മുതല്‍ ജൂലൈ 31 വരെ നീളുന്ന നിരോധനത്തി​െൻറ ക്രമീകരണങ്ങള്‍ കലക്ടര്‍ ഡോ. എസ്. കാര്‍ത്തികേയ​െൻറ അധ്യക്ഷതയില്‍ കലക്‌ടറേറ്റില്‍ ചേര്‍ന്ന യോഗം വിലയിരുത്തി. നിരോധനം ആരംഭിക്കുന്നതിനു മുമ്പ് ജനങ്ങളില്‍ അവബോധം സൃഷ്ടിക്കുന്നതിന് ഒമ്പതിന് രാവിലെ മുതല്‍ ഉച്ചവരെ കടലിലും ഉച്ചകഴിഞ്ഞ് കരയിലും മൈക്ക് അനൗണ്‍സ്‌മ​െൻറ് നടത്തും. ഒമ്പതിന് അര്‍ധരാത്രി ട്രോളിങ് ബോട്ടുകള്‍ നീണ്ടകര പാലത്തിന് കിഴക്കുവശത്തേക്കു മാറ്റി പാലത്തി​െൻറ സ്പാനുകള്‍ തമ്മില്‍ ചങ്ങലയിട്ട് ബന്ധിക്കും. ഇതിനുശേഷം അഷ്ടമുടിക്കായലി​െൻറ വിവിധ ഭാഗങ്ങളില്‍ നിയമവിരുദ്ധ ട്രോളിങ് തടയുന്നതിന് ഫിഷറീസ് വകുപ്പും മറൈന്‍ എന്‍ഫോഴ്‌സ്‌മ​െൻറും നടപടി സ്വീകരിക്കും. ഇന്‍ബോര്‍ഡ് വള്ളങ്ങള്‍ക്ക് ഡീസല്‍ അടിക്കുന്നതിനായി ശക്തികുളങ്ങരയിലും അഴീക്കലിലും മത്സ്യഫെഡ് പമ്പുകള്‍ തുറന്നു പ്രവര്‍ത്തിക്കും. സമാധാനപരമായ ട്രോളിങ് നിരോധനം ഉറപ്പാക്കുന്നതിന് തീരത്തും ഹാര്‍ബറുകളിലും പൊലീസി​െൻറ സജീവ സാന്നിധ്യം ഉറപ്പാക്കും. നിരോധനത്തിനു മുമ്പ് മത്സ്യബന്ധനത്തിനായി കടലിലേക്ക് പോകുന്ന ബോട്ടുകള്‍ക്ക് ശക്തികുളങ്ങരയിലെ മത്സ്യഫെഡ് ഡീസല്‍ പമ്പ് പ്രവര്‍ത്തിക്കുന്ന സ്ഥലത്ത് മത്സ്യം ഇറക്കി വിപണനം നടത്താം. അഴീക്കല്‍ ഹാര്‍ബറില്‍ ട്രോളിങ് ബോട്ട് നിയന്ത്രിക്കുന്നതിന് ഫിഷറീസ് വകുപ്പ് മറൈന്‍ എന്‍ഫോഴ്‌സ്‌മ​െൻറി​െൻറ സഹായത്തോടെ സംവിധാനമൊരുക്കും. ഹാര്‍ബറിലെ സൗകര്യങ്ങള്‍ മെച്ചപ്പെടുത്തുന്നതിന് ഹാര്‍ബര്‍ എൻജിനീയറിങ് വകുപ്പ് നടപടി സ്വീകരിക്കും. വള്ളങ്ങള്‍ നീണ്ടകര ഹാര്‍ബറില്‍ എത്തി മത്സ്യവിപണനം നടത്തണമെന്നും യോഗത്തില്‍ നിര്‍ദേശം നല്‍കി. നീണ്ടകര, അഴീക്കല്‍ എന്നിവിടങ്ങളില്‍ മറൈന്‍ എന്‍ഫോഴ്‌സമ​െൻറ് കണ്‍ട്രോള്‍ റൂമുകള്‍ 24 മണിക്കൂറും പ്രവര്‍ത്തിക്കും. സീ റെസ്‌ക്യൂ സ്‌ക്വാഡും കോസ്റ്റല്‍ പൊലീസ് ബോട്ടും രക്ഷാപ്രവര്‍ത്തനത്തിനുണ്ടാകും. നിരോധനകാലത്ത് ജോലിയില്ലാതാകുന്ന ബോട്ടുകളിലെ തൊഴിലാളികള്‍ക്ക് സൗജന്യ റേഷനും സമ്പാദ്യ ആശ്വാസ പദ്ധതിത്തുകയും ലഭ്യമാക്കും. ജി.എസ്.ടി: സംശയ നിവാരണ ക്ലാസ് കൊല്ലം: ജില്ലയിലെ വിവിധ സര്‍ക്കാര്‍ വകുപ്പുകളിലെ ജീവനക്കാര്‍ക്കായി ജി.എസ്.ടി രജിസ്‌ട്രേഷന്‍, റിട്ടേണ്‍ ഫയലിങ് എന്നിവ സംബന്ധിച്ച സംശയ നിവാരണ ക്ലാസ് വെള്ളിയാഴ്ച ഉച്ചക്ക് 2.30ന് ചരക്ക് സേവന നികുതി വകുപ്പ് ജില്ലാ ഫെസിലിറ്റേഷന്‍ സ​െൻററില്‍ നടക്കും.